د ریاستالوزرا اداري مرستیال عبدالسلام حنفي د جاپان سفارت سرپرست او ساساکاوای سولې بنسټ چارواکو سره د لیدنې پر مهال ویلي چې د افغانستان ابادۍ او جوړولو لپاره هڅې کوي.
د حکومت رسنیو مرکز نن «دوشنبه، مرغومې څلورمه» پر اېکس لیکلي چې په دې لیندنه کې حنفي ډاډ ورکړی چې د افغانستان خاوره به د بل هېواد پر ضد نهکارول کېږي او په وینا یې، له نورو هېوادونو سره د متقابل احترام پر بنسټ د نېکو اړیکو غوښتونکی دی.
هغه د دې لیدنې پر مهال زیاته کړې چې افغانستان کې امنیت ټينګ شوی او سرپرست حکومت د نشهيي توکو پر کښت د بندیز ترڅنګ د اداري فساد مخنیوي برخه کې هم ګامونه اخیستې دي.
بلخوا په دغه لیدنه کې د جاپان سفارت سرپرست تاکویوشي کورمیا ویلي چې یاد هېواد تر دې مهاله بېلابېلو برخو کې افغانستان سره د ۵۸ میلیونه ډالرو مرسته کړې او په وینا یې خپلو مرستو ته به دوام ورکړي.
کورمیا زیاته کړې چې جاپان به راتلونکې کې له پاکستانه په زور راستنېدونکو افغانانو سره د مرستې ترڅنګ د خوراکي توکو مرسته هم وکړي.
