د غور محلي مسوولان وايي چې نن د دغه ولایت د لعل او سرجنګل ولسوالي «دهنچهار اسیاب» کلي د اسلامي امارت او د یوه محلي قومندان ترمنځ نښته شوې ده.
د غور د والي ویاند عبدالواحد حماس په یوې خپره کړې خبرپاڼه کې ویلي، د اسلامي امارت ځواکونو غوښتل د مهدي مجاهد یو قومندان محمد مرادي ونیسي چې نوموړي مقاومت کړی او نښته رامنځته شوې ده.
د سلاموطندار پښتو فېسبوکپاڼه وڅارئ
د خبرپاڼې له مخې په یاده نښته کې د محمد مرادي په نوم قومندان له خپلو پنځو کسانو سره یوځای وژل شوی او د نوموړي زوی ټپي شوی دی.
په خبرپاڼه کې راغلي چې په یاده نښته کې درې میله ټوپک، یو میل توپانچه او دوه عراده موټرسایکل د اسلامي امارت د ځواکونو لاس ته ورغلي دي.
بلخوا د غور لوا مطبوعاتي دفتر هم په یوې خبرپاڼه کې ویلي چې په یاده نښته کې د اسلامي امارت یو سرتېری وژل شوی او دوه نور ټپیان دي.
خو یوې محلي سرچینې سلاموطندار ته ویلي، په دغه نښته کې د محمد مرادي په ګډون دوه ښځې هم وژل شوې دي.
دا په داسې حال کې ده چې پرون د غور امنیې قومنداني په یوې خبرپاڼه کې ویلي و چې د دغه ولایت د «دهنتګه غال» کلي کې یو محلي قومندان د اسلامي امارت له ځواکونو سره نښته کړې ده.
