فاریاب کې یو کس په خپل موټر کې دننه د ګاز نیونې له کبله مړ شوی دی. دغه پېښه نن سهار (یکشنبه، د مرغومې ۲۵مه) د ګرزېوان ولسوالي «بهارک» کلي کې رامنځته شوې ده.
د فاریاب د امنیې قومندان حمیدالله بتشکن سلاموطندار ته وايي چې دغه کس نقیبالله نومېده او د ګاز نیونې له امله په خپل موټر کې مړ شوی دی.
د بتشکن په وینا، دغه کس سهار وختي د خپل موټر بخارۍ چالانه کړې وه او همالته مړ شوی دی.
دا په داسې مهال دی چې پرون شنبه هم د یاد ولایت په بلچراغ ولسوالي کې یو کس د ګاز نیونې له امله خپل ژوند له لاسه ورکړی و.
په ورته مهال پرون خوست کې هم دوه کسان د ګازي بخارۍ له امله مړه شوي وو. د خوست د اطلاعاتو او فرهنګ رییس شبیراحمد عثماني سلاموطندار ته ويلي و، د دغه ولايت د اسماعیلخېلو او مندوزیو ولسوالي د ډډوالو کلي کې یو کس له خپلې مېرمنې سره يوځای د ګاز نیونې له امله مړه شوي دي.
سلاموطندار پر ټویټر هم وڅارئ
د شبیراحمد عثماني په وينا، یاد کس څخه په خپله کوټه کې ګازي بخارۍ خلاصه پاتې شوې وه چې له امله یې مېرمن او خاوند مړه شوي دي.
