د لوګر امنیې قومنداني چارواکي وایي چې امنیتي ځواکونو تېره شپه په مرکز پلعلم ښار کې څلور کسان د غلا په تور نیولي دي.
د یاد ولایت امنیه قومنداني ویاند احمدالله انس پلعلم کې خبریالانو ته وویل، دغه کسان د مرکز پلعلم ښار د لومړۍ امنیتي حوزې اړوند په «هونې سفلي» سیمه کې د پولیسو له لوري د موټرو او له کورونو څخه د غلا په تور نیول شوي دي.
د سلاموطندار پښتو فېسبوکپاڼه وڅارئ
انس زیاته کړه، «له نیول شویو کسانو څخه یو کرولا ډوله موټر، یو زرنج، یو موټرسایکل، پنځه بایسکېلونه، د اوبو اببازکونه او ۱۶کیلو ګرامه نشهيي توکي ترلاسه شوي دي.»
د امنیه قومنداني ویاند زیاتوي چې نیول شوي کسان د دغه ولایت مرکز پلعلم ښار اصلي اوسېدونکي دي او امنیتي ځواکونو یې د اوږدې مودې راهیسې د نیولو هڅې کولې.
د لوګر اوسېدونکي هم خوښ دي چې د امنیتي ځواکونو له لوري څلور کسان د غلا په تور نیول شوي، خو ټینګار کوي چې له یادو کسانو دې په سمه توګه څېړنه وشي که غله وپېژندل شي، باید علني سزا ورکړل شي.
د لوګر امنیه قومنداني داسې مهال د غلو د څلور کسیزې ډلې د نیولو خبر ورکوي چې د دغه ولایت پلعلم ښار کې له یوې مودې راهیسې د غلاو شکایتونه زیات شوي وو.