اېټالیا کې پولیس وايي چې د دغه هېواد په سوېلي سیسلي ساحل کې له کښتیو څخه یې ۵.۳ ټُنه کوکاین نیولي دي.
پولیسو زیاته کړه چې د نیول شویو کوکاینو ارزښت ۸۵۰ میلیونه یورو ته رسېږي چې په تړاو یې پنځه کسان هم نیول شوي دي.
د پولیسو په وینا، دا لومړی دی چې دغه هېواد کې په دومره لوړه کچه نشهيي توکي نیول کېږي.
په ورته مهال د اېټالیا پولیسو ویلي چې دغه کښتۍ له سوېلي امریکا څخه د اېټالیا سیسلي تنګي ته روانه وه او غوښتل یې یاد کوکاین کب نیوونکو کښتیو ته تسلیم کړي چې د دوی له لوري نیول شوي دي.
پولیسو همداراز وویل چې یاده کښتۍ د دوی تر څار لاندې وه او یاد کوکاین په کښتیو کې د تختو شاته ځای پر ځای شوي وو.
له یادو نشهيي توکو سره دوه د ټونس وکوي، یو اېټالیوی، یو د البانیې او یو فرانسوی وګړی نیول شوي دي.
د سلاموطندار پښتو فېسبوکپاڼه وڅارئ
له دې وړاندې د روان کال په اپرېل میاشت کې هم ایټالیوي پولیسو په ختیځ سیسلي کې دوه ټُنه کوکاین چې په یوې کښتۍ کې ځای پر ځای شوي وو، نیولي وو.
