د افغانستان برښنا شرکت وایي، تخنیکي ډلو یې د کوچني اختر په ورځو کې هم په سوېلي سالنګ کې د نړل شویو ستنو پر اساسي رغونې خپل کار ته دوام ورکړی.
د برښنا شرکت ویاند حکمت الله میوندي پر خپل ټویټرپاڼه لیکلي چې هڅه کوي، څو د نړول شویو ستنو د اساسي ترمیم کار ژر تر ژره بشپړ شي.
د سلاموطندار پښتو فېسبوکپاڼه وڅارئ
دغه پایې د جمعې سهار وختي نړول شوې وې. چارواکو په دې تړاو د دوو مشکوکو کسانو د نیولو خبر هم ورکړی دی.
میوندي دغه راز ویلي چې پرون سهار د کابل په بتخاک سیمه کې د لوړ ولتاژ یوې پای ته ماینونه ایښودل شوي و چې کشف او شنډ کړل شوي دي.
له دې وړاندې وړمه ورځ د کابل په چمتله سیمه کې د ماین په چاودنه کې د برښنا د یوې پایې د نړولو هڅه شوې، خو چاودنې زیان نه دی اړولی.
کابل او نورو ولایتونو ته د وارداتي برېښنا د ستونو د الوزولو د پیښو مسولیت چا یا کومې ډلې ندی اخیستی.
دا ډول پېښې د تېرجمهوري نظام په وروستیو کلونو کې ډېرې تکرار شوي چې د کابل او نورو ولایتونو اوسیدونکي یې په ورځو ورځو له برېښنا بې برخې کړي و.
