د افغانستان بانک په یوې خبرپاڼه کې له خلکو غوښتنه کړې چې له هغو صرافانو سره د پیسو لېږدرالېږد «مبادلې او حوالې» له معاملاتو ته ډډه وکړي چې د فعالیت جواز نهلري.
یاد بانک نن پنجشنبه، غبرګولي لسمه پر خپله اېکسپاڼه په خپره کړې یوې خبرپاڼه کې ویلي چې هېوادوال دې، یوازې هغو صرافانو سره د پیسو اړوند معاملات وکړي چې له «افغانستان بانک» یې د فعالیت جواز اخیستی وي.
د سلاموطندار پښتو فېسبوکپاڼه وڅارئ
دغه بانک همداراز لیکلي، جوازلرونکي صرافان په پلازمېنه کابل او ولایتونو کې فعالیت کوي او په وینا یې، خلک دې د خپلو پیسو خوندیتوب لپاره «خپل مالي معاملات جوازلرونکو صرافانو سره ترسره کړي.»
د افغانستان بانک لیکلي: «له دې لارې ګرانو هېوادوالو ته خبر ورکول کېږي چې د پیسو د مبادلې او حوالې معاملات دې له هغو صرافانو سره ترسره کړي چې د افغانستان بانک لهخوا ورته د فعالیت جوازونه صادر شوي وي.»
د یاد بانک په خبرپاڼه کې هغو صرافانو څخه یو ځل بیا د جوازاخیستلو غوښتنه شوې چې تراوسه یې د صرافي اړوند فعالیت جواز نهدی اخیستی.
د افغانستان بانک خبرداری ورکړی، که بېجوازه صرافان خپلې غیرقانوني کړنې ونهدروي، قانوني چلن به ورسره وکړي.
په خبرپاڼه کې راغلي: «د افغانستان بانک د ۱۲۸۶۲ ګڼې او ۱۴۰۳/۰۳/۰۳ نېټې متحدالمال له لارې محترمو صرافانو ته خبرو ورکړی دی او اوس یو ځل بیا هغو ټولو وګړو او اشخاصو ته چې د افغانستان بانک لهخوا د صادر شوي، جواز څخه پرته په غیرقانوني ډول د صرافانو او پولي خدمتونو فعالیتونه کوي، خبر ورکول کېږي، څو خپلې غیرقانوني کړنې ژر ترژره ودروي…د پرېکړې نهعملي کولو صورت کې به له سرغړوونکو سر قانوني چلن وشي.»
د افغانستان بانک له دې وړاندې هم هېواد کې له صرافانو غوښتنه کړې وه چې د خپلو کارونو قانوني کولو لپاره دې د فعالیت جوازونه ترلاسه کړي.
