په شمالي او شمال ختیځو ولایتونو کې د پرونیو سېلابونو له امله سلګونه کسان مړه او ټپیان شوي او د دې مرګژوبلې تر ټولو ډېره برخه په بغلان کې ولایت کې اوښتې ده.
د خوړو نړیوال پروګرام په یوه خبرپاڼه کې ویلي چې په بغلان کې د تېرې ورځې سېلابونو له امله تر ۳۰۰ ډېر کسان مړه او له زرو ډېر استوګنیز کورونه ویجاړ شوي دي.
د پاکستان لومړي وزیر شهباز شریف د جمعې په ورځ یوې اقتصادي غونډې ته ویلي، هېواد یې له افغانستان سره د «ترجیحي» سوداګري په اړه خبرو ته چمتو دی او په دې اړه خبرېاترې هم روانې دي.
له دې سره هممهاله د افغانستان او پاکستان د سوداګرۍ ګډې خونې مسوولان وايي، له خبرواترو او د څو دوهاړخیزو مواردو له حل وروسته به د دواړو هېوادونو ترمنځ ترجیحي سوداګري پیل شي.
په افغانستان کې د ملګرو ملتونو د خوړو نړیوال پروګرام وايي چې په بغلان کې د راوتلو سېلابونو له کبله څه باندې ۳۰۰ کسانو خپل ژوند له لاسه ورکړی او له ۱۰۰۰ ډېر کورونه ویجاړ شوي دي. بلهخوا په بغلان کې محلي سرچینو ځینو رسنیو ته ویلي چې سېلابونو یوازې د دغه ولایت په برکه او مرکزي بغلان ولسوالیو کې د ۲۵۰ کسانو ژوند اخیستی دی.
په کابل کې له ۳۰ وزګاره ځوانانو سره د سلاموطندار مرکې ښيي چې له نیمايي ډېر هغه یې د جمهوریت له چپه کېدو وروسته وزګاره شوي دي. په دغه راپور کې له یوولسو ښځو او نولسو نارینهوو سره مرکې شوي او اتلس هغو یې ویلي چې د سرپرس حکومت له راتګ وروسته یې دندې له لاسه ورکړې دي.
د ا.ا ویاند ذ.بېحالله م.جاهد وايي چې د ارشاد، حج او اوقافو وزارت سرپرست نورمحمد ثاقب د یوه پلاوي په مشري په ترکیه کې د اسلامي نړۍ د علماوو غونډه کې د ګډون په موخه استانبول ته تللی دی.
د تخار محلي مسوولان وايي چې په دغه ولایت کې راغلیو سېلابونو لسګونه سیمې ویجاړې کړي چې له کبله یې شل کسانو ژوند بایللی او پنځلس نور هم ورک شوي دي.
د تخار د طبیعي پېښو پر وړاندې د مبارزې رییس احمدسیر ساجد وايي چې د دغه ولایت په مرکز او ولسوالیو کې د سختو بارانونو او سېلابونو راوتلو له کبله لږترلږه شل کسان مړه شوي دي.
د ا.ا ویاند ذ.بېحالله م.جاهد په بغلان، بدخشان، غور او هرات ولایتونو کې د پرونیو سېلابونو له زیانمنو سره خواخوږي ښودلې او ویلي یې دي چې ا.ا به خپل ټول امکانات د یادو زیانمنو د لاسنیوي لپاره وکاروي. هغه له افغانانو هم غوښتي چې د طبیعي پېښو له زیانمنو سره د مرستې لپاره لاسونه را بډ وهي.
د ملګرو ملتونو عمومي مجمع د یوه پرېکړهلیک په تصویبولو سره په دغه سازمان کې د یوه خپلواک هېواد په توګه د فلسطین بشپړ غړیتوب ته مثبته رایه ورکړه.
دغه سازمان په خپل پرېکړهلیک کې لیکي چې فلسطین د ملګرو ملتونو سازمان د غړیتوب وړتیا لري او له امنیت شورا یې غوښتي چې د فلسطین غوښتنه بیا هم وارزوي.
په افغانستان کې له اوږدې وچکالۍ وروسته سږنی پسرلی له ډېرو بارانونو سره پیل شوی دی. دغه اورښتونه چې په تېره میاشت کې پیل شوي، نن او سبا یې هم د هېواد په لږترلږه ۲۲ ولایتونو کې د اورېدو اټکل شوی دی. دغو بارانونو د غنمو په حاصلاتو کې چې د افغانستان مهم کرنیز محصول دی، د زیاتوالي هیلې را ټوکولې دي.
د دې راډیو د امتیاز خاوند سعدالله صالحي وايي، راډیو به یې شپاړلس ساعته نشرات ولري او خبري، کلتوري، اسلامي، ښوونیزې او روغتیايي خپرونې به پهکې خپرېږي.
نوموړی وايي، د راډیو پر جوړولو یې شل زره ډالر لګوي او د کابل په شمالي ولایتونو کې به نشرات کوي.
د ټرانسپورټ او هوايي چلن وزارت د هواپېژندنې ریاست مسوولان په ۲۲ ولایتونو کې د سختو بارانونو کېدو او د سېلابونو راوتلو خبرداری ورکړی دی.
په افغانستان کې د ملګرو ملتونو د خوړو پروګرام وايي، پر خوارځواکۍ د هرو درېوو اخته افغان ماشومانو له ډلې یوازې د یوه هغه ملاتړ کولای شي.
دغه پروګرام نن پر خپلې اېکسپاڼې لیکلي چې تر اوسه په افغانستان کې درې میلیونه ماشومانو پر خوارځواکۍ اخته شوي دي.
د افغانستان برښنا شرکت مسوولانو د سېشنبې په ورځ په کابل کې د یوې خبري غونډې پر مهال وویل، تېر کال یې له اوزبکستان څخه د ۱۰۵ میلیونه ډالرو، له تاجکستانه د ۷۱ میلیونه ډالرو، له ترکمنستان څخه د ۶۴ میلیونه ډالرو او له ایران څخه هم د ۴۸ میلیونه ډالرو په ارزښت برښنا را وارد کړې ده.
د بدخشان د امنیې قومانداني مسوولان وايي، هغه ستونزې چې درې ورځې وړاندې د دغه ولایت د دریام او ارګو ولسوالیو په قرلق او ګنده چشمه سیمو کې د کوکنارو د کښت له منځه وړلو پر سر د خلکو او د ا.ا د ځواکونو ترمنځ رامنځته شوې وې، حل شوي او وضعیت عادي شوی دی.
د عامې روغتیا سرپرست وزیر قلندر عباد د افغانستان لپاره د روغتیا نړیوال سازمان د ختیځې مدیترانې له عمومي رییس حنان حسن بلخي او د یونیسف له استازي سره د لیدنې پر مهال په ولسوالیو کې د روغتونونو او په افغانستان کې د ساري ناروغیو د کنټرول او د روغتیايي سېسټم پر پیاوړتیا ټینګار کړی دی.
د افغان خبريالانو د خوندیتوب کمېټې مسوولانو که څه هم په کابل کې د مې مياشتې درېيمه یا د مطبوعاتو ازادۍ په نړيواله ورځ په یوه غونډه کې د رسنيو د فعاليت او اطلاعاتو ته د لاسرسي وضعيت د نسبي ښهوالي په اړه خوشبيني څرګنده کړه، خو په وینا یې، د سرپرست حکومت چارواکو لا هم د خبریالانو د ستونزو هواري لپاره جدي او عملي ګامونه نهدي اوچت کړي.
