د افغانستان د سوداګرۍ او پانګونې خونې مسوولان وايي چې د تېر کال پر مهال یې د څه باندې یو میلیارډ ډالرو په ارزښت مېوې او سبزیجات بهر ته صادر کړي دي.
د افغانستان د سوداګرۍ او پانګونې خونې رییس یونس مومند وايي چې افغانستان تېر کال د یو میلیارډ او ۸۶۵ میلیونه ډالرو په ارزښت صادرات کړي چې ۸۵سلنه زیاتوالی ښيي.
د سلاموطندار پښتو فېسبوکپاڼه وڅارئ
نوموړی د صادراتو پر وړاندې د ستونزو کمېدل د صادراتو د زیاتېدو مهم لامل بولي. هغه وویل: «د صادراتو برخه کې ستونزې حل شوي او صادارت مو زیات شوي دي. تېر کال مو ۷۰۰زره ټُنه مېوې او سبزیجات بهر ته صادر کړي چې د تېرو کلونو په پرتله لوړوالی ښيي.»
د کرنیزو محصولاتو یوشمېر صادروونکي د صادراتو کچې لوړېدو څخه خوښي ښيي او وايي، ګټه یې هم زیاته شوې ده. د وچې میوې صادروونکي رحیمالله وویل، تېر کال ته په پرتله یې د صادراتو کچه د پام وړ زیاته شوې.
هغه وویل: «د تېرو کلونو په پرتله اسانتیاوې ښیې دي او څلور ډوله مېوه بهر ته صادروو چې صادراتو کې یې ستونزه نهلرو او له همدې امله مو صادرات زیات شوي او د توکو لېږد امنیت برخه کې اندېښنه هم نهلرو.»
په ورته وخت کې یوشمېر سوداګر ا.ا څخه غواړي چې د سړو خونو په جوړولو او د هوا له لارې د صادراتو لپاره د زمینې په برابرولو سره د توکو د صادرولو کچه تر دې هم لوړه کړي.
کندهار کې د سبزۍ سوداګر سید کریم وویل، د کرنیزو محصولاتو ساتلو لپاره د سړوخونو نهشتون هغه له جدي ستونزو سره مخ کړی دی.
هغه وویل: «سمه ده چې اسانتیاوې رامنځته شوي، خو ځینې سبزیجات چې موږ بهر ته صادروو، وخت کم لري او په لاره کې خرابېږي او ټول زحمت او عوایدو مو لهمنځه ځي.»
د افغانستان د سوداګرۍ او پانګونې خونې مسوولان زیاتوي چې تېر کال زیاتره صادرات د ځمکې او هوا له لارې ګاونډیو هېوادونو ته شوي او د زیاتولو لپاره یې هڅې لاهم دوام لري.