فاریاب کې سرچینې سلاموطندار ته وايي چې دغه ولایت کې یوې ۵۶کلنې ښځې ځانوژنه کړې ده.
سرچینې زیاتوي چې پېښه د دغه ولایت قرغان ولسوالي اړوند سیمه کې رامنځته شوې ده.
د سلاموطندار پښتو فېسبوکپاڼه وڅارئ
سرچینې همداراز ویلي چې یاده مېرمن سلطانه نومېده او پرون پنجشنبه د غويي اوومه د قرغان ولسوالي اړوند «باغوبوستان» کلي یې ځانوژنه کړې او ژوند ته یې د پای ټکی ایښی دی.
ویل کېږي چې دغې مېرمنې د رواني ناروغۍ له امله ځانوژنه کړې ده. له دې پېښې څه باندې دوه اوونۍ وړاندې هم یادې ولسوالي کې یوه ۳۵کلن کس د بېوزلۍ او اقتصادي ستونزو له کبله ځانوژنه کړې وه.
دا په داسې مهال دی چې پرون کاپیسا کې هم یوې ښځې ځانوژنه کړې وه. د کاپیسا د امنیې قومنداني ویاند عبدالفتاح فایز سلاموطندار ته ویلي و چې دا پېښه پرون پنجشنبه شاوخوا نهه بجې د دغه ولایت د مرکز اړوند په بادامعلي سیمه کې شوې ده.
د نوموړي په وینا، یاده ښځه یاسمین نومېږي چې دېرش کاله عمر لري او د پروان د بګرام ولسوالي د «نوده» کلي اصلي اوسېدونکې ده.
هغه وايي، تر اوسه د دې پېښې لامل او انګېزه نه دي روښانه او امنیتي ځواکونو یې په اړه پلټنې او څېړنې پیل کړې دي.
د یادونې ده چې د تېر یوه کال پر مهال د هېواد په بېلابېلو ولایتونو کې د ځانوژنې پېښې زیاتې شوې دي. د دغو پېښو ډېری لاملونه بېوزلي، کورنی تاوتریخوالی او دوښمني په ګوته شوي دي.