د لوګر د کلیو پراختیا او بیارغونې ریاست مسوولان وایي چې د ملګروملتونو د ماشومانو ملاتړ صندوق «UNICEF» له لوري په خروار ولسوالي کې د څښاک پاکو اوبو رسولو یوه شبکه جوړېږي.
د لوګر د کلیو پراختیا او بیارغونې ریاست مطبوعاتي مسوول صبغتالله نایبخېل سلاموطندار ته ویلي چې د څښاک پاکو اوبو رسولو دغه شبکه د شاوخوا ۴.۵ میلیونه افغانیو په مالي لګښت د درېوو میاشتو په موده کې جوړېږي چې له ګټې اخیستنې وروسته به ۳۰۰ کورنیو ته د څښاک پاکې اوبه برابرې شي.
د سلاموطندار پښتو فېسبوکپاڼه وڅارئ
نایبخېل زیاته کړه چې په یاده پروژه کې د یوې ژورې څاه کېندل، د ۶۰ متره مکعبه په ظرفیت د اوبو ذخیرې جوړول، له ذخیرې څخه کورونو ته نږدې ۴زره متره پایپ غځول او همدارنګه یادې شبکې ته د ۳۰ سولرو په ظرفیت برېښنا برابرول شامل دي.
باید وویل شي چې تر دې وړاندې هم د ملګروملتونو د ماشومانو ملاتړ صندوق «UNICEF» له لوري په مرکز پلعلم، محمداغې، برهکي برک، څرخ او خروار ولسوالیو کې د څښاک پاکو اوبو ورته شبکې جوړې او ګټې اخیستنې ته سپارل شوي دي.