د میدانوردګ امنیتي مسوولان وايي چې دغه ولایت کې بېګاه شپه یوه عمر خوړلي کس ځانوژنه کړې ده. پېښه د دغه ولایت د سیداباد ولسوالي د نخي درې اړوند «کوډۍ» کلي کې رامنځته شوې ده.
د میدانوردګ د امنیې قومنداني له لوري سلاموطندار ته په رالېږل شوې خبرپاڼه کې ویل شوي چې دغه کس شاوخوا ۷۰کاله عمر لري او خپل ځان یې زندۍ کړی دی.
د سلاموطندار پښتو فېسبوکپاڼه وڅارئ
په خبرپاڼه کې د یاد کس د کورنۍ له قوله راغلي چې نوموړي عصبي ناروغي لرله او له همدې امله یې ځانوژنه کړې ده. دا په داسې مهال دی چې د روانې اوونۍ د سهشنبه پر ورځ په ننګرهار کې هم یوه ۵۵کلن کس ځانوژنه کړې وه.
د ننګرهار د امنیې قومنداني ویاند عبدالبصیر زابلي سلاموطندار ته ویلي و چې پېښه سهشنبه د غويي ۱۲مه د دغه ولایت د مومندرې ولسوالي اړوند سیمه کې رامنځته شوې ده.
د زابلي په وینا، دغه کس چې رحیمداد نومېده، رواني ناروغي یې لرله او ځانوژنه یې کړې ده. د ننګرهار د امنیې قومنداني ویاند د یاد کس د کورنۍ د غړیو له خولې ویلي چې نوموړي په ټوپک ځان ویشتلی او وژلی دی.
دا په داسې مهال دی چې له دې وړاندې هم په یاد ولایت او د هېواد په نورو سیمو کې د ځانوژنې پېښې رامنځته شوي چې مسوولانو یې لاملونه، کورنی تاوتریخوالی، رواني ناروغۍ او بېوزلي یاد کړي دي.
