د روغتیا نړیوال سازمان «who» افغانستان کې د غوره روغتیايي خدمتونو د وړاندې کولو په پار د روغتیا وزارت اړوند ۲۵ روغتونونو سره د طبي او نورو توکو مرسته ډېره کړې ده.
یاد سازمان د روانې سپټمبر میاشتې له لومړیو تر راتلونکو درېوو میاشتو به څه باندې ۴۰۰زره کسانو ته درمل، طبي تجهیزات او نور روغتیايي خدمتونه برابر کړي.
د سلاموطندار پښتو فېسبوکپاڼه وڅارئ
د روغتیا نړیوال سازمان د وروستي راپور پر بنسټ، افغانستان کې د ملاریا درملنې تشخیص لپاره امکانات نشته او غوښتنه یې کړې چې روغتیايي مرکزونو ته دې په منظمه توګه د ملاریا درملنې درمل او نور توکي ولېږدول شي.
د یاد سازمان په وینا، که دغه تشه ډکه نهشي، افغانستان کې د ملاریا ناروغي د خپرېدو ګواښ ژوندی دی.
په راپور کې راغلي چې د روغتیا نړیوال سازمان له ۵۴ نورو بنسټونو سره د افغانستان د ۳۳۳ ولسوالیو په ۷۹۷ روغتیايي مرکزونو کې څه باندې یو میلیون او ۵۰۰زره کسانو ته روغتیايي خدمتونه وړاندې کړې دي.
د خپور شوي راپور پر بنسټ یاد سازمان د ۲۹ ولایتونو په لرو پرتو سیمو کې ۳۱۹زره او ۶۸ کسانو ته د ۲۲۶ روغتیايي مرکزونو پرمټ بېلابېل روغتیايي خدمتونه رسولې دي.
د روغتیا نړیوال سازمان همداراز په کندهار او روزګان کې پر نشهيي توکو د روږدو کسانو د درملنې مرکزونه هم جوړ کړي چې ۱۰۰ او ۲۰ بستره لري.
د یاد سازمان په راپور کې همداراز راغلي، پر خوارځواکۍ د اخته پنځهزره او۹۶۳ کسانو له ډلې چې ۲۸۶۲ یې نجونې او ۳۱۰۱ یې هلکان دي، د روغتیا نړیوال سازمان په ۱۳۰ روغتیايي مرکزونو کې بستر او درملنه یې شوې ده.
