د انګلستان د کرېکټ ملي لوبډله چې دا مهال په راولپنډۍ کې ده، یوشمېر لوبغاړي یې د خوړو له امله ناروغان شوي او ښايي د دواړو لوبډلو ترمنځ لومړۍ ټسټ لوبه یوه ورځ وځنډېږي.
یوشمېر رسنیو نن راپور ورکړی چې د انګلستان د کرېکټ ملي لوبډلې نیمايي لوبغاړي پاکستان کې د خوړو له امله ناروغ شوي او ښه وضعیت نهلري.
د انګلستان او ویلز کرېکټ بورډ بیا یوې خبرپاڼه کې ویلي چې د لوبډلې یوشمېر لوبغاړي او منجمنټ برخې ځینې کارکوونکي یې ناروغان شوي او هوټل کې د پاتې کېدو لارښوونه ورته شوې ده.
په ناروغو شویو لوبغاړي کې د انګلستان د ټسټ لوبو لوبدلمشر بن سټوکس هم شامل دی. د انګلستان او ویلز کرېکټ بورډ دا نه دي ویلي چې لوبغاړي د څه له امله ناروغ شوي دي.
بلخوا د انګلستان یوه لوبغاړي «جو روټ» نن راولپنډۍ کې یوې خبري ناسته کې د لوبغاړو د مسمومېدو راپورونه رد کړل او وویل: «فکر نه کوي چې دغه لوبغاړي د خوړو له امله مسموم شوي یا د کورونا ویروس له امله.»
په ورته مهال د دواړو لوبډلو د لوبډلمشرانو خبري کنفرانس چې باید نن ترسره شوی وای، د انګلستان د لوبډلمشر بن سټوکس د ناروغۍ له امله تراوسه نه دی ترسره شوی.
له دې وړاندې هم د انګلستان کرېکټ ملي لوبډلې یوشمېر لوبغاړو دغه هېواد کې د شل اووره سیالیو پر مهال د ناسمو خوړو څخه شکایت کړی و.
د انګلستان کرېکټ بورډ پاکستان ته د خپلې لوبډلې له لېږلو وړاندې لوبغاړو ته د خوړو برابرولو په موخه یو اشپز هم ګومارلی و چې له ملي لوبډلې سره یوځای پاکستان ته تللی دی.
سلاموطندار پر ټوېټرپاڼه هم وڅارئ
خو د اشپز له ګومارنې سربېره بیا هم پاکستان کې د انګلستان نیمايي لوبډله د خوړو له کبله ناروغه شوې او معلومه نه ده چې لومړۍ ټسټ لوبې ته به چمتو شي او که نه.