د غزني په مرکز او درېوو ولسوالیو کې د یو میلیون امریکايي ډالرو په ارزښت د بیارغونې د ۵۷ پروژو چارې پیل شوې. دغه پروژې د ملګروملتونو د خوړو نړیوال پروګرام له لوري پلې کېږي.
د افغانستان لپاره د ناروې کمېټې د سوېلي حوزې مسوول سعیدمحمد نوید سلاموطندار ته ویلي چې یادې پروژې به غزني ښار او درېوو ولسوالیو کې پلې او ورسره به ۹۱۸۸ کسانو ته د کار زمینه هم برابره شي.
د سلاموطندار پښتو فېسبوکپاڼه وڅارئ
د نوید په وینا، په دغو پروژو کې د اوبو د ۴۸ کوچنیو بندونو جوړول، د کاریزونو پاکول او د پُلونو او پُلچکونو رغول شامل دي. دغه پروژې په غزني ښار، اندړ، خواجهعمري او واعظ ولسوالیو کې پلې کېږي.
د غزني د اقتصاد رییس نادرښاه شریف بیا وايي چې د یادو پروژو د چارو په پیلېدو سره به زرګونه کسانو ته د کار زمینه برابره او ورسره د یاد ولایت د اوسېدونکو پر اقتصاد مثبت اغېز وکړي.
بلخوا غزني کې د اقتصادي چارو شنونکي بیا پر دې باور دي چې دغه ولایت کې د اوبو بندونو له جوړېدو د هرکلي ترڅنګ وايي چې یادې پروژې به د یاد ولایت کرنه وغوړوي او اوبه به یې مدیریت شي.