د پاکستان د بهرنیو چارو وزیر شاهمحمود قریشي په افغانستان کې د تاوتریخوالي لوړه کچه غندلې او د تاوتریخوالي کموالي او اوربند غوښتنه یې کړې ده.
قریشي دغه څرګندونې د افغانستان د بهرنیو چارو له وزیر محمدحنیف اتمر سره په لیدنه کې چې د اسلامي همکاریو سازمان د بهرنیو چارو وزیرانو د ناستې په څنډه کې د نایجر په پلازمېنه نیامي کې جوړه شوې وه، کړې دي.
بهرنیو چارو وزارت نن په یوه خبرپاڼه کې لیکلي چې دواړو لوریو د سولې پروسې د بریا، په باعزته توګه د افغان کډوالو د بېرته را ستنېدو د یوې بشپړې تګلارې، منطقوي اتصال او د دواړو هېوادونو سوداګریزو ستونزو ته د رسېدو په اړه خبرې کړې دي.
د خبرپاڼې له مخې، دواړو لوریو پرېکړه کړې چې د دواړو هېوادونو کاري کمېټې دې دوهاړخیزو همکاریو او هغو هوکړو ته په کتو چې افغانستان ته د پاکستان د لومړي وزیر عمراخان د سفر پر مهال شوي، خپل کار ګړندی کړي.
عمران خان د لړم میاشتې په نههویشتمه کابل ته راغی او له ولسمشر محمداشرف غني سره یې په یوه ګډه خبري غونډه کې ژمنه وکړه چې د تاوتریخوالي کموالي او اوربند په برخه کې به له افغانانو سره لازمه همکاري وکړي.
دا په داسې حال کې ده چې اوس په افغانستان کې د تاوتریخوالي کچه لوړه شوې او هره ورځ له لسګونو افغانانو قرباني اخلي.
