سترې محکمې ویلي چې د سوداګرۍ او صنایعو پخوانی وزیر میر محمدامین فرهنګ یې له واک نه د ناسمې ګټې اخیستنې او فساد په تور په یوه کال بند او دولت ته د ۸۶۴ زره امریکايي ډالرو په ورکولو محکوم کړی دی.
سترې محکمې په یوه خبرپاڼه کې ویلي چې د میر محمدامین فرهنګ محکمه نن په کابل کې جوړه شوې وه. فرهنګ په دې محکمه کې نه و او محکمې یې په نه موجودیت کې پرېکړه کړې ده.
د خبرپاڼې له مخې، د وزیرانو ځانګړې محکمې په یوه علني قضايي غونډه کې چې د قضايي پلاوي له لوري جوړه شوې وه، د میر محمدامین فرهنګ دوسیه څېړل شوې ده.
سترې محکمې ویلي چې نوموړی محکمې ته را غوښتل شوی و، خو دا چې نه و راغلی، د قانون پر بنسټ، حاضر ګڼل شوی او موظف څارنوال ته یې وخت ورکړی چې د تورن پر وړاندې د دعوې اقامه وکړي.
په خبرپانه کې لیکل شوي: «وروسته د عدلیې وزارت د حقوقي مرستو عمومي ریاست حقوقي مرستندوی چې د تورن د دفاع لپاره ټاکل شوی و، د خپل موکل دفاع وکړه او په دوام یې څارنوال او حقوقي مرستندوی د قضايي پلاوي پوښتنو ته لازم معلومات وړاندې کړل.»
میر محمدامین فرهنګ تر اوسه په دې اړه څه نه دي ویلي.
