ییل‌لرچه آزرده‌لیک و دوسیه توزهتیشدن سونگ، اجتماعی ترماق‌لرده ملی اسلامی جنبش حزبی رهبری و جمهورلیک ریاستی نینگ سابق اورین باسری مارشال عبدالرشید دوستم و مملکت جمهور رئیسی محمداشرف غنی نینگ اوچره‌شوویدن بیرقطار صورتلر ترقه‌تیلگن.
ایتیلیشیچه، اوشبو اوچره‌شوو اوتگن “دوشنبه” کونی شام چاغیده، جمهورلیک ریاستیده صورت تاپگن. بیرقطار منبع‌لرنینگ ایتیش‌لریچه، جمهور رئیس‌گه یقین سیمالر بلخ سابق حاکمی عطامحمد نور و افغانستان اسلامی جمعیت حزبی رهبری صلا‌ح‌الدین ربانی نینگ حمایتی‌نی جلب قیلیش اوچون سعی و حرکت قیلماقده‌لر.
عین‌حالده، بیلیم یورت اوقیتووچی‌لریدن بیری اکرام عارفی نینگ ایتیشیچه، طالبان، خلق ارا جماعه‌سی و سیاسی حزب‌لر جناب غنی نینگ دولتی اوستیگه فشارنی کوپه‌یتیرگن و انه‌شو سبب، جمهور رییس غنی ایچکی جبهه‌سینی کوچلی قیلیش‌نی ایسته‌یدی، بیراق اونینگ ایتیشیچه، سیاسی حزب‌لر رهبرلری و سیاستچی‌لر نینگ جناب غنی‌دن یمان تجربه‌لری بولگنی سبب، او بیلن تاکتیکی شکلده برخورد قیلهدیلر.
شونینگدیک، خلق ارا رابطه‌لر بولیمی ایش بیلرمانلریدن بیری حمید عزیزی نینگ ایتیشیچه، طالبان بیلن دشمن‌لیگی بولگن بیرقطار سیاستچی‌لرنی جناب غنی نینگ یانیده توخته‌یشی ممکن. اونینگ ایتیشیچه، سیاستچی‌لردن بیرقطاری طالبان‌نی ایشانچی‌لی متحد صفتیده قبول قیلهدیلر.
ایتیلیشیچه، بوندن آلدین آمریکا تشقی ایشلر وزیری بیر نامه آرقه‌لی، جناب غنی دن مملکت سابق جمهور رئیس حامد کرزی، ملی مصالحه کینگشی باشلیغی عبدالله عبدالله و جهادی سیمالردن بولمیش عبدالرب رسول سیاف بیلن افغانستان تینچلیک جریانی خصوصیده ایش قیلیشی‌نی سوره‌گن ایدی.
