بغلان ولایتی پلخمری تاش کومیر کانی و جوزجان ولایتیده آمودریا حوزه‌سی جنگل کلان گازینی قزیب آلیش، تیکشیریش و کینگه‌یتیریش شرطنامه‌سی، اسلام امیرلیگی باش وزیری‌نینگ اقتصادی اورین باسری ملا عبدالغنی برادر اشتراکیده، کانلر و پترولیم وزیرلیگی، امارتی کمپنیه‌لر عمومی ریاستی و عزیزی گروپ اورته‌سیده امضالندی.
اسلام امیرلیگی کانلر و پترولیم وزیری هدایت‌الله بدری، آمودریا نفت و گاز حوزه‌سیده میدانی اوچ کیلومتر مربع‌دن آرتیق بولگن جنگل کلان طبیعی گازینی قزیب آلیش لایحه‌سی ۳۰ ییل مدت گه، ۲۷۵ میلیون دالر سرمایه کیریتیش عوضی گه عملگه آشیریلیشینی معلوم قیلدی.
بدری‌نینگ ایتیشیچه، اوشبو لایحه‌لردن اسلام امیرلیگیگه ۱۵ فایز اولوش بیریله‌دی. او شونده‌ی دییدی: «کانلر و پترولیم وزیرلیگی اوشبو لایحه‌نینگ برچه ایشلرینی شرطنامه بندلری، عملده‌گی قانونلر، تخنیک ستندردلر همده یشش محیط تماییللریگه موافق روشده، قطعی نظارت قیله‌دی. بو آرقه‌لی جماعتچیلیک منفعت‌لرینی تأمینلش و مذکور طبیعی ذخیره‌دن ثمره‌لی فایده‌لنیشی مقصد قیلینگن.»
کانلر و پترولیم وزیرلیگی مسئوللری‌نینگ ایتیشیچه، بو لایحه‌لر عملگه آشیریلگن حالده، بیر مینگ میگاوات برق ایشلب چیقریش و دییرلی ایکی مینگ کیشی گه ایش زمینه‌سی یره‌تیلیشی ممکن.
شو بیلن بیرگه، امارتی کمپنیه‌لر عمومی باشلیغی احمدجان بلال، شرطنامه‌لرنی افغانستان‌نی صناعتی بولیشینی کوچه‌یتیریش اوچون مهم حرکت دیب بیله‌دی.
اونیگ تأکیدلشیچه، افغانستان‌نینگ برقرار و ارزان برق انرژی گه بولگن احتیاجی تاباره آرتیب بارماقده. شو باعث، برق انرژی‌سینی وارد قیلیشگه قره‌م بولیشدن کوره، ایچکی منبعلر حسابی‌دن انرژی تأمیناتینی یولگه قوییش حکومت‌نینگ مهم استوار یونه‌لیشلریدن بیری دیر.
او شونده‌ی دییدی: «اوشبو لایحه‌لرنینگ عملگه آشیریلیشی طبیعی منبعلردن ینه‌ده ثمره‌لی فایده‌لنیش، انرژی وارد قیلیش خره‌جتلرینی کمه‌یتیریش و ینگی ایش اورینلرینی یره‌تیش اوچون زمینه یره‌تیشی ممکن. شونینگدیک، لایحه‌لرنی عملگه آشیریش جریانیده اطراف-محیط‌نی محافظه قیلیش طلب‌لریگه رعایه ایتیش مقصدیده زمانه‌وی تکنالوژی‌لر و خلق‌ارا ستندردلردن فایده‌لنیش لازم.»
باشقه تاماندن، عزیزی گروپ کمپنیه باشلیغی میرویس عزیزی، اوشبو شرطنامه‌لر امضالنگنیدن سونگ، لایحه‌لرنینگ عملی ایشلری تیز آره‌ده باشلنیشینی معلوم قیلدی.
او، کمپنیه‌نینگ مملکت گه سرمایه کیریتیش باره‌سیده جدی‌لیگینی بیلدیریب، اوشبو لایحه‌لر بیلن بیرقطارده سرطان کسللیگیگه چلینگن بیمارلرنی دوالشگه اختصاصلشگن شفاخانه، توغروق و عیاللر سلامت‌لیگی شفاخانه‌سی همده طبیات بیلیم یورتی قوریلیشی بوییچه عملی ایشلر هم باشلنگنینی بیلدیردی.
اوشبو شرطنامه‌لر طبیعی منبعلرنی اوزلشتیریش، مملکتده انرژی ایشلب چیقریش حجمینی آشیریش، وارد قیلینه‌یاتگن برق انرژی گه قره‌ملیکنی کمه‌یتیریش و ینگی ایش اورینلرینی یره‌تیش مقصدیده امضالنگن. افغانستان‌نینگ برقرار انرژی گه بولگن احتیاجی همده اقتصادی آست قوریلمه‌لرنی کینگه‌یتیریش ضرورتینی حسابگه آلگنده، بو مسئله‌لر علیحده اهمیت کسب ایته‌دی.
