هر سفر عطسه اوریش، یوتل و بوغوز آغریغی کوزهتیلگنده، مملکتدهگی ایریم عایلهلر شفاکار گه مراجعت قیلمسدن آلدین اویده موجود انتیبیوتیکلرنی استعمال قیلهدی؛ اولر بو دارولر شماللش یا کی بوغوز آغریغی کسللیگینی یخشی قیلیشنی تصور قیلهدی، بیراق جهان ساغلیقنی سقلش تشکیلاتی شماللش، بوغوز آغریق و آنفلوانزا کسللیکلرنی دوالش اوچون انتیبیوتیکلرنی اوز باشیمچهلیک بیلن استعمال قیلیش عاقبتلریدن آگاهلنتیریب، بو دارولر یوقوملی کسللیکلر گه قرشی تاثیر کورستمسلیگینی ایتهدی.
تشکیلات، ایکس اجتماعی ترماغیده شوندهی دیب یازگن: «شماللش، بوغوز آغریق یا کی آنفلوانزانی دوالش اوچون انتیبیوتیکنی استعمال قیلمنگ، چونکی انتیبیوتیکلر ویروسلر گه قرشی تاثیر کورستمهیدی. انتیبیوتیکلرنی باشقهلر بیلن شریک قیلمنگ و قالگن انتیبیوتیکلرنی کیلهجکده فایدهلنیش اوچون سقلب قویمنگ.»
شو بیلن بیرگه، بیرقطار شفاکارلرنینگ فکریچه، زکام، شماللش و بوغوز آغریغی کبی حالتلرده انتیبیوتیکلرنی استعمال قیلیش کسللیکنینگ توزهلیشیگه هیچ قندهی تاثیر کورستمهیدی. عکسینچه، انتیبیوتیکنی اوز باشیمچهلیک بیلن استعمال قیلیش سلامتلیک اوچون سلبی تاثیر قیلیشی ممکن.
شفاکار منیراحمد کمال، انتیبیوتیکلرنینگ اوز باشیمچهلیک بیلن استعمال قیلیش زیانلری حقیده شوندهی دییدی: «انتیبیوتیکلر شماللش و بوغوز آغریق کبی کسللیکلر گه تاثیر کورستمهیدی. اونینگ اوز باشیمچهلیک بیلن استعمال قیلیش میکروبنینگ چیدهملی بولیشیگه آلیب کیلهدی، شونینگدیک، حساسیت و ایچکیتمه گه سبب بولهدی.«
برچهسی بیلن، ایریم عایلهلرنینگ ایتیشیچه، دارولرنی اوز باشیمچهلیک بیلن استعمال قیلیش اولر آرهسیده عادت گه ایلنگن و اونینگ عاقبتلری و خطرلری حقیده ییترلیچه خبرلری یوق.
کابل یشاوچیسی زهرا شوندهی دییدی: «بیز اویده هردایم زکام بولسهی اویده قالگن دارونی قوللنهمیز، ضررلری حقیده بیلمهیمیز حتا بیر سینگلیم کسل بولسه اونی داروسینی باشقهلر هم قوللنهدی.»
اهالینینگ انتیبیوتیکلرنی اوز باشیمچهلیک بیلن استعمال قیلیش ضررلری حقیده ییترلی معلوماتلری یوقلیگیدن تشقری، اقتصادی قیینچیلیک هم ایریم یشاوچیلرنینگ فکریچه، آدملرنی تورلی دارو واسطهلرینی شفاکارنینگ توصیهسیز استعمال قیلیشگه اونداوچی عامللردن بیری حسابلنهدی.
کابل شهریدن بولگن مصورنینگ ایتیشیچه، ایریم عایلهلرنینگ آغیر اقتصادی احوالی اولرنی کسللیکلرنی دوالش اوچون تورلی دارو واسطهلری، جملهدن انتیبیوتیکدن فایدهلنیشگه مجبور قیلهدی. او شوندهی دییدی: «افغانستانده کوپینچهلرنینگ اقتصادی احوالی یخشی ایمس هر قندهی دارودن یا کی شو انتیبیوتیکدن قوللنهدی، بیراق شفاکارنینگ مصلحتسیزلیگی بیلن فایدهلنیش ضرری بار اما اولر بیلیشمهیدی.»
شفاکارلرنینگ تاکیدلشیچه، انتیبیوتیکلر فقط باکتری عفونتلرنی دوالش اوچون قوللنیلهدی، شماللش و بوغوز آغریق کبی ویروسلی کسللیکلرنی دوالشده ایسه نتیجه بیرمهیدی.
شو سببلی، اولر زکام بولگن کیشیلر گه دم آلیش، ییترلی مقدارده سویوقلیک ایچیش ایسیتمه و آغریقنی کمهیتیریش اوچون تیگیشلی دارو واسطهلریدن فایدهلنیشنی توصیه ایتهدیلر.



