مین عباس حبیبی، مکتب‌نینگ اون بیرینچی صنف اوقووچیسی من. مکتب دستورلری و درس‌لیکلردن تشقری، وقتیم‌نینگ بیر قسمینی تعلیم آلیش و اجتماعی فعالیت گه بغیشله‌گنمن؛ چونکی کیله‌جک‌نی بنیاد ایتیش عینن بوگوندن و منه شو صنف میزلری آرتیدن باشلنه‌دی دیب ایشانه‌من. بوگون سیزنی بیر نیچه دقیقه گه شخصی تجربه‌منی اوقیشگه تکلیف قیلماقچیمن؛ بو – صنعی هوش دیب اته‌لووچی حادثه بیلن تنیشوویم و او بیلن حیاتیم حقیده‌گی حکایه.
راستینی ایتسم، بو تکنالوژی دنیاده ایلک بار تاپیلگن کونلرده او حقیده کوپ معلومات گه ایگه ایمس ایدیم و البته، بو مین اوچون معما هم ایمسدی. همه‌سی عادی بیر کونده، دوستانه صحبت دوامیده باشلندی. دوستم دنیاده‌گی حیرت‌لنرلی اوزگریش‌لر و ینگی واسطه‌لر حقیده گپیرردی. شو صحبت دوامیده «صنعی هوش» نامی بیر نیچه بار تکرارلندی. اوشه صحبت مینده قیزیقیش اویغاتدی. اوشه کون‌نینگ اوزی‌ده اینگ شیمَریب، بو نامعلوم دنیانی اورگنیش‌نی باشله‌دیم، تا کی بو حادثه نیمه ایکنینی و انسان اوچون قنده‌ی ایشلرنی عملگه آشیره آلیشینی توشونه‌ی.
دستلبکی تصوریم و توشونچه‌م کوپچیلیکده‌کی کبی یوزه‌کی و وقتینچه‌لیک ایدی. صنعی هوش‌نی شونچه کی وقت اوتکزیش اوچون مولجللنگن کونگیل‌آچر دستور، قیسقه متن یازیشی، بیرار جمله‌نی ترجمه قیلیشی یا کی املا خطالرنی توزه‌تیشی ممکن بولگن واسطه دیب اویلردیم. اما بو دنیانینگ ایچیگه کیریب، تورلی واسطه‌لرنی شخصاً سینب کورگنیمده، بوندن انچه کتته حقیقت گه دوچ کیلدیم. صنعی هوش عادی واسطه‌دن انچه کینگ، کوچلی و انسان حیاتینی آسانلشتیریش اوچون کتته اوزگریش‌لر آلیب کیلووچی تکنالوژی ایکنینی توشوندیم.
دستلبکی قدم‌لریم عادی ایدی. صنعی هوش‌دن فایده‌لنیشنی باشله‌دیم. انگلیس تیلینی اورگنیشگه اینتیله‌یاتگن اوقووچی صفتیده گرامر بوییچه سواللریم و یازووده‌گی قیینچلیک‌لریمنی اوندن سورردیم. اینگ مرکب توشونچه‌لرنی مینگه اینگ ساده، انیق و توشونرلی شکلده توشونتیریب بیریشینی کوریش حیرت‌لنرلی ایدی. استه-سیکین تنیشوو دایره‌م کینگه‌یدی. علمی سواللر گه جواب تاپیش و تدقیقات آلیب باریشدن تارتیب، گرافیک پوسترلر یره‌تیش، صنف تقدیمات‌لری اوچون سُلایدلر، وقت‌نی باشقریش، کونده‌لیک ریجه‌لشتیریش و درس ریجه‌لرینی توزیشگچه – همه‌سی تیزلیک و قولی‌لیک کسب ایتدی.
حاضر قریب ایکی ییل دیر کی، مین و صنعی هوش یانمه-یانمیز. بو دور مابینیده حیات طرزیم و اوقیش اصلوبیمده کتته اوزگریش یوز بیردی. بو تکنالوژی نه‌فقط وقتیمنی تیجه‌دی، بلکی ایلگری عموماً توشونچگه ایگه بولمه‌گن موضوع‌لرده‌گی فکری قیینچیلیک‌لریمنی هم حل قیلیشگه یاردم بیردی. مین اوچون صنعی هوش ایندی جان‌سیز واسطه ایمس؛ او شخصی رواجلنیش یولیمده عقللی همکار، مصلحتچی و یول کورسه‌تووچیگه ایلنگن.
سیز بیلن بیر مهم تمایل‌نی اورتاقلشماقچیمن: مین هیچ قچان حیاتیم باشقرووینی تولیق صنعی هوس قولیگه تاپشیرمه‌گنمن. عکسینچه، اوزیم اوقیمن، چقور فکرله‌یمن، یوره‌من، خطا قیله‌من و اورگنه‌من؛ اما بو تکنالوژی‌دن یانیمده‌گی یاردمچی صفتیده فایده‌لنه‌من. فکرلش، تحلیل قیلیش و ایجادکارلیک – مینیکی، تیزلیک، ترتیب و قیته ایشلش ایسه اونیکی.
سونگی‌ده یاش اولاد گه اینیقسه بو یولگه ایندیگینه قدم قویگنلر گه صمیمی خبریم بار: صنعی هوش انسان تامانیدن یره‌تیلگن کوچلی همکار دیر، او انسان‌نینگ اراده‌سی، محنتی و تفکری‌نینگ اورنینی باسووچی واسطه ایمس. بو واسطه‌لرنینگ موجودلیگی بیزنی اوقیش ذوقی‌دن، چقور فکرلشدن و محنت قیلیشدن محروم ایتیشگه یول قویمسلیگی‌میز کیره‌ک. مبادا بیر کون کیلیب، بو تکنالوژی‌سیز عادی ایش‌نی هم بجره آلمه‌ی قالسک ایدی! بیز اوزیگه خاص‌لیگیمیز و شخصی قابلیت‌لریمیزنی سقلب قالیشی‌میز همده تکنالوژی‌دن فقط ینه‌ده بلندراق و تیزراق پرواز قیلیش اوچون فایده‌لنیشی‌میز کیره‌ک. مینیمچه، دنیا و مملکتی‌میز کیله‌جگی صنعی هوش‌دن قورقمه‌یدیگن و اونگه قره‌م بولیب، اونده غرق بولمه‌یدیگن، بلکی اوندن قنده‌ی قیلیب عقللی، مسئولیتلی و مقصدلی فایده‌لنیشنی اورگنه‌دیگن انسان‌لر گه تیگیشلی.
