بیرلشگن ملتلر تشکیلاتی‌نینگ خاتین-قیزلر بولیمی میلادی ۲۰۲۶ ییلده بوتون دنیا بویلب تخمیناً ۴۲۶ میلیون عیال و قیز آغیر قشاقلیک شرایطی‌ده یشه‌یاتگنینی معلوم قیلدی. تشکیلات گه کوره، اجتماعی حمایه، ساغلیق‌نی سقلش خذمت‌لری و تعلیم ساحه‌لریگه سرمایه کیریتیش‌نی آشیریش کیره‌ک.
تشکیلات، بوگون (۲۵ میزان/۱۷ اکتوبر، شنبه) کمبغل‌لیک‌نی یوق قیلیش خلق‌ارا کونی مناسبتی بیلن، اجتماعی حمایه تیزیملرینی مستحکم‌لش همده خاتین-قیزلرنینگ ساغلیق‌نی سقلش و تعلیم خذمت‌لریدن فایده‌لنیش امکانیت‌لرینی کینگه‌یتیریش قشاقلیک‌نی کمه‌یتیریش و اولرنینگ تورموش شرایطینی یخشی‌لش اوچون مهم ایکنینی تأکیدله‌گن.
بیرلشگن ملتلر تشکیلاتی‌نینگ خاتین-قیزلر بولیمی، حکومت‌لر و مسئول اداره‌لرنی عیاللر و قیزلر اوچون تینگ امکانیت‌لر یره‌تیش، اولرنینگ اقتصادی و اجتماعی احوالینی یخشی‌لش مقصدیده ینه‌ده ثمره‌لی چاره‌لر کوریشگه چقیرگن.
کمبغل‌لیک‌نی یوق قیلیش خلق‌ارا کونی، میلادی ۱۹۹۲ ییلده بیرلشگن ملتلر تشکیلاتی عمومی ییغیلیشی تامانیدن بیلگی‌لنگن بولیب، ۱۹۹۳ ییلدن بویان هر ییلی ۱۷ اکتوبر ده نشانلنه‌دی. اوشبو کون‌نینگ مقصدی کمبغل‌لیک حقیده جماعتچیلیک خبردارلیگینی آشیریش، خلق‌ارا همجمعیت اعتبارینی محتاج انسانلرنینگ معمالریگه قره‌تیش، احتیاج‌مندلر بیلن بیردملیک‌نی مستحکم‌لش همده حکومت‌لر و خلق‌ارا تشکیلات‌لرنی بوتون دنیا بویلب کمبغل‌لیک و محروم‌لیککه برهم بیریش اوچون عملی چاره‌لر کوریشگه اونده‌شدن عبارت.
