قورغاقچیلیک‌نینگ کوچه‌یشی و سوو منبع‌لری‌نینگ کمه‌یشی آرتیدن میدان‌وردک ولایتیده بیرقطار دهقان‌لر مقابل ایکینچیلیک ایکینی و ینگی درآمد منبعی صفتیده هنگ (آنغوزه) ییتیشتیریش گه قیزیقیش بیلدیرگن. اولرنینگ ایتیشیچه، بو اوسیملیک کوپلب باشقه ایکینچیلیک ایکین‌لریگه نسبتن کمراق سوو و خره‌جت طلب قیله‌دی.
میدان‌وردک ولایتی سیدآباد تومنیده یشاوچی دهقان حضرت خان‌نینگ ایتیشیچه، ایکینچیلیک ایکین‌لرینی ییتیشتیریش‌ده سوو تنقیص‌لیگی بیلن باغلیق معمالر کوچه‌یگچ، او هنگ ییتیشتیریش گه یوز کیلتیرگن.
اونینگ سوزلریگه کوره، هنگ کمراق سوو و خره‌جت طلب قیله‌دی همده کوپلب باشقه ایکین‌لر گه نسبتن دهقان‌لر گه یخشی درآمد کیلتیریشی ممکن. اونینگ کوپه‌تیریشیچه، حاضرده میدان‌شهر و ولایت‌نینگ کوپلب تومن‌لریده هنگ ییتیشتیریش کینگ ترقه‌لگن بولیب، ایریم دهقان‌لر اوشبو فعالیت آرقه‌لی یوز مینگلب افغانی درآمد آله‌دی. او شونده‌ی دییدی: «اوچ ییلدن بیری هنگ ایکه‌من، اوتگن ییللرده هم اونی ایککن من. اوتگن ییلی ۲۴ مینگ بوته هنگ ایکدیم. شوندن ایکی مینگ بوته‌دن ۴۰ کیلوگرام محصول آلدیم. هر بیر کیلوگرام‌نی ۱۱ مینگ افغانی‌دن ساتدیم و یخشی فایده کوردیم.»
شو بیلن بیرگه، نرخ و جلریز تومن‌لریده‌گی ایریم دهقان‌لر هم سلام‌وطندار بیلن صحبتده، سونگی ییللرده ایکینچیلیک اوچون سوودن فایده‌لنیش امکانیتی کمه‌یگنینی، شو سببلی هنگ ییتیشتیریش گه اوته‌یاتگن دهقان‌لر سانی آرتیب باره‌یاتگنینی ایتیشگن
اوشبو دهقان‌لر حکومت‌دن خصوصاً زراعت وزیرلیگی‌دن هنگ‌نی مسلکی طرزده ییتیشتیریش‌نی کینگه‌یتیریش، محصولات صفتینی یخشی‌لش و اونی بازار گه چیقریش اوچون ضرور تعلیم همده عملی کورستمه‌لر بیریشنی سوره‌یدیلر.
میدان‌وردک ولایتیده هنگ ییتیشتیروچی دهقان صالح محمدنینگ ایتیشیچه: «هنگ میوه و سبزه‌وات‌لر گه نسبتن یخشی‌راق حاصل بیریب و درآمدی کوپراق. بوندن تشقری، میدان‌وردک‌نینگ آب-هواسی و اقلیم شرایطی هنگ ییتیشتیریش اوچون جوده مناسب و صفتلی محصول بیره‌دی و فایده‌سی هم کوپ.»
ولایتده‌گی ینه بیر دهقان کریم‌الله هم هنگ محصولات‌لرینی ییتیشتیریش بوییچه اوقوو دستورلری و مارکیتینگ امکانیت‌لرینی کینگه‌یتیریش ضرورلیگینی تأکیدله‌یدی. اونگه کوره: «مین حکومت‌دن اهالی‌نینگ هنگ ایکیش حقیده آگاهی‌لیگینی آشیریش و محصولات‌لرنی ساتیش اوچون مناسب بازار تاپیشنی ایسته‌ی من. پمیدار کبی سبزه‌وات‌لر کوپ سوو و کود طلب قیله‌دی، هنگ ایسه انچه کم سوو، کود و خره‌جت بیلن ییتیشتیریله‌دی، درآمدی هم کوپراق.»
شو بیلن بیرگه، زراعت متخصص‌لری سوو تنقیص‌لیگی و قورغاقچیلیک‌نینگ کوچه‌یشی شرایطی‌ده کم سوو طلب قیله‌دیگن ایکین‌لرنی ییتیشتیریش دهقان‌لر اوچون تاباره مهم اهمیت کسب ایته‌یاتگنینی ایته‌دیلر.
اولرنینگ ایتیشیچه، میدان‌وردک‌نینگ اقلیمی و طبیعی شرایطی هنگ ییتیشتیریش اوچون قوله‌ی بولیب، سونگی ییللرده ولایتده اوشبو اوسیملیک ایکیله‌دیگن میدانلر کینگه‌یگن.
میدان‌وردک ولایتی ایکینیچیلیک، سووغاریش و چارواچیلیک ریاستی معلومات‌لریگه کوره، حاضرده ولایت‌نینگ بهسود حصه اول و حصه دوم، سیدآباد، جلریز، نرخ و جغتو تومن‌لریده اونلب جریب ییر میدان‌لریده هنگ ییتیشتیریلگن.
میدان‌وردک ایکینچیلیک ریاستی‌نینگ زراعت ایشلری بوییچه آمری رفیع‌الله بهیر سلام‌وطندار بیلن صحبتده ایتیشیچه، سونگی اوچ ییل ایچیده ولایتده هنگ ییتیشتیریش سیزیلرلی درجه‌ده آشگنینی و محصولات‌نینگ بیر قسمی باشقه ولایت‌لر همده خارجی مملکتلر گه صادر قیلینه‌دی. او شونده‌ی دییدی: «هنگ دهقان‌لر اوچون مهم اقتصادی ایکین‌لردن بیری حسابلنه‌دی. بو اوسیملیک میدان‌وردک‌نینگ ایریم منطقه‌لریده طبیعی روشده اوسه‌دی، باشقه حدودلرده ایسه ایکیش آرقه‌لی ییتیشتیریله‌دی.»
افغانستان‌ده قورغاقچیلیک و سوو تنقیص‌لیگی دهقان‌لر اوچون جدی معمالردن بیری بولیب تورگن بیر پیتده، هنگ کبی کم سوو طلب قیله‌دیگن ایکین‌لرنی ییتیشتیریش نه‌فقط سوونی تیجش گه، بلکی دهقان‌لر اوچون ینگی درآمد منبعینی یره‌تیشگه هم خذمت قیلیشی ممکن.
