کنر ولایتی مرکزی اسعدآباد شهری اهالیسی‌نینگ بیر قسمی سونگی ییللرده قوریلیش ایشلری‌نینگ کینگه‌یشی نتیجه‌سیده شهرده‌گی یشیل حدودلرنینگ کتته قسمی یوقالیب کیتگنینی ایته‌دیلر. اولرگه کوره، یشیل حدودلرنینگ قیسقریشی حرارت‌نینگ آشیشی، چنگ-توزان و اطراف-محیط افلاسلنیشی‌نینگ کوچه‌یشیگه آلیب کیلگن.
اسعدآباد یشاوچسی بولگن هدایت‌الله صافی، شهرده‌گی یشیل حدودلرنینگ یوقالیشیگه یول قویمسلیک و ینگی باغ‌لر برپا ایتیش چاره‌لرینی کوریش کیره‌ک‌لیگینی ایته‌دی. اونینگ تأکیدلشیچه، موجود یشیل حدودلرنی سقلب قالیش و درخت‌لرنینگ کیسیلیشینی چیکلش ضرور. او شونده‌ی دییدی: «موجود یشیل حدودلر سقلنیب قالیشیگه و درخت‌لر کیسیلیشی چیکلنیشیگه امید قیله‌میز. یشیل حدودلر جوده مهم، چونکی اولر نه‌فقط شهرنی آباد قیله‌دی بلکی تازه هوا و اهالی‌نینگ هاریق چیقریشی اوچون هم کتته اهمیت گه ایگه. باله‌لرنینگ خوف‌سیز اوینه‌شی اوچون جای یوق، یاش‌لر ایسه سپورت بیلن شغللنیش و دم‌آلیش اوچون مناسب محیط تاپه آلمه‌یپتی.»
اسعدآبادنینگ ینه بیر یشاوچیسی اکرام‌الله احساس‌نینگ ایتیشیچه، ایلگری او بعضاً چرچاق‌نی چیقریش اوچون سیل‌گاه‌لر و یشیل حدودلر گه بارردی، بیراق حاضر بونده‌ی جایلردن فایده‌لنیش امکانیتی چیکلنگن. «هوانینگ افلاسلنیشی، حرارت‌نینگ کوتریلیشی، باله‌لر اوچون اویین میدان‌لری‌نینگ یوقلیگی و روحی سلامت‌لیک بیلن باغلیق معمالر یوزه گه کیلگن اساسی قیینیچلیک‌لردن دیر. درخت ایکیش دستورلرینی کینگه‌یتیریش، ناقانونی قوریلیش‌لرنی نظارت قیلیش و هر بیر محله‌ده جماعت باغ‌لرینی برپا ایتیش کیره‌ک» دییدی، او.
شونینگدیک، اسعدآباد شهریده کوپ ییللردن بیری یشب کیله‌یاتگن ینه بیر فقرا لمر صافی، یشیل حدودلرنینگ قیسقریشی اونینگ عایله‌سی اعضالری‌نینگ جسمانی و روحی سلامت‌لیگیگه سلبی تأثیر کورستگنینی بیلدیره‌دی. او شونده‌ی دییدی: «تازه هوانینگ ییتیشمسلیگی، شاوقین و چنگ‌نینگ کوپه‌یشی همده دم‌آلیش امکانیت‌لری‌نینگ آزلیگی چرچاق و روحی باسیمنی کیلتیریب چیقرماقده.»
کنر اهالیسی قوریلیش جریانینی ترتیب گه سالیش، موجود یشیل حدودلرنی محافظه قیلیش و جماعت باغ‌لرینی برپا ایتیش آرقه‌لی اطراف-محیط حالتینی یخشی‌لش همده اهالی اوچون مناسب دم‌آلیش مسکن‌لرینی یره‌تیش ضرورلیگینی سوره‌یدی.
باشقه تاماندن اسعدآباد بلدیه‌سی‌نینگ اجتماعی و فرهنگی بولیمی مسئولی محمد زهیر، اوشبو اداره شهرنی رواجلنتیریش ریجه‌لرینی قیته کوریب چیقیش و بهالش ایشلرینی باشله‌گنینی، بو جریان‌ده یشیل حدودلر هم بیلگی‌لب چیقیلگنینی ایته‌دی. او شونده‌ی دییدی: «اوز باشیمچه‌لیک بیلن قوریلگن و اوتمیشدن قالگن بنالر حاضرده شهر رواجیگه توسقین‌لیک قیلماقده. عملده‌گی ریجه‌لرنی قیته کوریب چیقیش‌دن مقصد هم اوز باشیمچه قوریلیش‌لرنینگ آلدینی آلیش و شهرنینگ ریجه‌سیز، ترتیب‌سیز کینگه‌یشیگه یول قویمسلیک یوللرینی انیقلش دیر. شو آرقه‌لی کیله‌جکده تورر جایلر زمانه‌وی، پخته ایشلب چیقیلگن و ترتیبلی ریجه اساسیده کینگه‌یتیریله‌دی.»
شو بیلن بیرگه، اطراف-محیط بوییچه ایریم متخصص‌لر یشیل حدودلرنینگ یوقالیشی اقلیم اوزگریشی‌نینگ سلبی عاقبت‌لرینی و اهالی‌نینگ اوشبو حادثه گه نسبتن ضعیف‌لیگینی کوچه‌یتیریشینی ایته‌دی.
اطراف-محیط بوییچه متخصص احسان گه کوره، هوا حرارتی‌نینگ کوتریلیشی و چنگ‌نینگ کوپه‌یشی یشیل حدودلرنینگ ویران قیلینیشی عاقبتیده‌گی اینگ مهم عامللردن دیر. او شونده‌ی دییدی: «یشیل حدودلر چنگ، توتون و ایسیق‌لیک‌نی کمه‌یتیریشده مهم رول اوینه‌یدی. بو حدودلر یوقالگنده هوانینگ افلاسلنیشی کوچیه‌دی و حرارت کوتریله‌دی. بونده‌ی وضعیت اقلیم اوزگریشی‌نینگ عاقبت‌لرینی ینه‌ده کوچه‌یتیریب، قورغاقچیلیک و ایسیق بیلن باغلیق معمالرنی آشیره‌دی.»
یشیل حدودلر و جماعت باغ‌لری هوانینگ افلاسلنیشینی کمه‌یتیریش، اطراف-محیط حرارتینی معتدل‌لشتیریش، اهالی سلامت‌لیگینی یخشی‌لش و شهرلرنی آبادانلشتیریش‌ده مهم اهمیت گه ایگه. بیراق شهرلشوونینگ کوپه‌یشی، اهالی سانی‌نینگ آرتیشی و نظارت‌سیز قوریلیش‌لر کوپلب شهرلرده بونده‌ی حدودلرنینگ قیسقریشیگه سبب بوله‌دی.
