هر ییلی کوکلم موسومی ییتیب کیلیشی بیلن، مملکتنینگ بیر قطار بولیملری اینیقسه کابل شهریده کوچت و گللرنینگ ساتیلیش بازاری رواجلنهدی. پایتخت یشاوچیلریدن قطاری قیزیقیش بیلن یشیللیک، گوزهللیک و یشش محیط یخشیلنیشی مقصد حویلی و حویلیلریدن تشقریگه کوچت و گل ایکهدیلر.
کابل دهگی کوچت و گل ساتووچیلردن قطاری، ساتیشلری کوپهیگنیدن خورسندلیک بیلدیریب و ایتیشلریچه، اهالیدن کوپ قطاری اویلری یشیللیگی و چیرایلیگی اوچون حوت آیینینگ یریمیدن ثور آیی یکونیگچه، میوهلی و میوهسیز کوچت همده گل ساتیب آلهدیلر.
کابل شهریدهگی کوچت ساتووچیلردن بیری حامدنینگ ایتیشیچه: «بهارده ساتیشلریمیز یخشی بولگن و اهالی، میوهلی و میوهسیز کوچتلر همده شمشاد و مرسل گلینی کوپراق ساتیب آلهدیلر. حاضر کوچت ایکیش موسومی بولگنی اوچون اهالی کوپراق کوچت ساتیب آلهدی.»
شونینگدیک کابل شهریدهگی گل ساتووچیلردن محمدشکیبنینگ ایتیشیچه، حوت آییدن بویان ساتیش میزانی آشیب و هر کونی کوپینچه کیشی گل آلیش اوچون دکانیگه بارهدی. «چونکه بهار موسومی دیر، اهالی اوییگه گل و کوچت ایکهدی که انه شوو سبب، مشتریلریمیز سانی کوپهیگن. شونینگدیک ایشیمیز هم رواجلنگن.»
باشقه بیرتاماندن، کوچت و زینتی گل ساتیب آلهدیگن کیشیلردن قطاری، حویلیلریگه نیچه ته کوچت ایککنلرینی بیان قیلیب و ایتیشلریچه، اوی و شهر یشیللیگی اوچون یالغیز کوچت ساتیب آلیش ییترلی بولمهی، بلکیم کوچتلر سقلهنیشیده هم اهالینینگ توجه قیلیشی کیرهک.
کابل شهری کارتهی نو منطقه یشاوچیسی شاهمحمودنینگ ایتیشیچه: «بو ییل یشیللیک و یشش محیط پاکلیگی اوچون نیچهته کوچت ساتیب آلدیک و حویلیمیز گه ایکدیک. کوچت ایکیش یانیده، اولرنینگ سقلهنیشی گه هم توجه قیلیشیمیز کیرهک.»
شونینگدیک کابلنینگ چهارراهی شهید یشاوچیلریدن رفیع، کوچت و گللر سقلهنیشی توغریسیده شوندهی دیدی: «بو ییل زردآلو، انار و آلمه کوچتلرینی ساتیب آلدیم و حویلیمیز گه ایکدیم. اولکهداشلریمیزدن ایکیلگن کوچتلرگه سوو بیریب و بالهلریگه درخت همده گللر شاخچهلرینینگ کیسمسلیکلرینی سورهیمین.»
شوندهی بیرحالده، پایتخت یشاوچیلری آرقهلی کوچت و گل ایکیلیشی یانیده، شونینگدیک کابل بلدیهسی آرقهلی کوچت و گل ایکیلیش ایشینینگ دوامی بار. کابل بلدیهسی فرهنگی مصلحتچیسی و وکیلی نعمتالله بارکزینینگ ایتیشیچه، مذکور اداره حمل آیی یکونیگچه شهرنینگ تورلی بولیملریگه بیر میلیون کوچت و موسومی گللرنی ایکیش توغریسیده برنامهسی بار. «۱۴۰۵-ییل بهار موسومیده، کابل شهرینینگ تورلی بولیملریگه بیر میلیون کوچت و گل ایکهمیز و بو جریان اوتگن قویاش ییلی ۱۵-حوتده باشلهنیب و حمل آیی یکونیگچه دوام قیلهدی.»
هر ییلی بهار موسومی باشلنیشی بیلن، کابل ده یشیل محیط کوچهیشی مقصد بیر قطار برنامهلر عملگه آشیریلهدی؛ بو جریان، گل و کوچت ساتووچیلرنینگ ایش وضعیتی یخشیلنیشیگه یاردم بیرهدی.
