اسلام امیرلیگی تیمیر یول اداره‌سی باشلیغی عبدالکریم فاتح، اقتصادی همکارلیک‌لر تشکیلاتی (اکو) منطقه‌وی ییغیلیشی‌ده اشتراک ایتیش اوچون قزاقستان گه جونب کیتگن.
فواید عامه وزیرلیگی سوزلاوچیسی محمداشرف حق‌شناس، بوگون (۲۲ میزان/۱۴ اکتوبر، چهارشنبه) ایکس اجتماعی ترماغیده بیر بیانیه ترقه‌تیب، تیمیر یول اداره‌سی باشلیغی اوشبو ییغیلیش‌ده افغانستان تیمیر یوللری‌نینگ حاضرگی احوالی، بو ساحه‌ده عملگه آشیریله‌یاتگن لایحه‌لر و مذکور اداره‌نینگ کیله‌سی ریجه‌لری حقیده سوز یوریتیشی ممکن دیگن.
حق‌شناس‌نینگ ایتیشیچه، اسلام امیرلیگی هیئتی اکو گه اعضا مملکتلرنینگ وکیللری بیلن منطقه‌وی باغلنیش، سودا، ترانزیت و اقتصادی همکارلیک‌لرنی کینگه‌یتیریش حقیده بحث ایتیشی ممکن.
فواید عامه وزیرلیگی سوزلاوچیسی‌نینگ تأکیدلشیچه، اوشبو ییغیلیش‌ده اشتراک ایتیش افغانستان و ایکو گه اعضا دولتلر اورته‌سیده تیمیر یول ساحه‌سیده همکارلیک‌نی کینگه‌یتیریش، سرمایه کیریتیش امکانیت‌لرینی یره‌تیش همده منطقه‌وی باغلیق‌لیکنی مستحکم‌لش اوچون زمینه یره‌تیشی کوتیله‌دی.
ایکو، اعضا دولتلر اورته‌سیده اقتصادی، سودا، مدنی و تخنیک همکارلیک‌نی مستحکم‌لش مقصدیده تشکیل ایتیلگن مهم منطقه‌وی تشکیلات‌لردن بیری دیر.
