تورکیه ملی استخبارات باشلیغی ابراهیم کالین، افغانستاندن کیین پاکستان گه باریب بو مملکت ییریک رسمیلری بیلن اوچرهشگن.
آنادولو ییتکرمهسی، کالین بوگون (۲۶ سنبله/۱۷ سپتمبر، پنجشنبه) اسلامآباد گه سفر قیلیب بو مملکتنینگ ییریک رسمیلری بیلن اوچرهشگنینی ایتگن.
ابراهیم کالین پاکستان گه قیلگن اوشبو سفری دایرهسیده بو مملکت باش وزیری شهباز شریف، اردو باشلیغی مارشال عاصم منیر و پاکستان ملی استخبارات باشلیغی عاصم مالک بیلن اوچرهشگن.
دنیا اینیقسه یقین شرقده ایران و امریکا همده حوثیلر و سعودی عربستان تامانیدن قوللب-قوتلنهیاتگن یمن حربی کوچلری اورتهسیده اوروش دوام ایتماقده ایکن، تورکیه استخبارات باشلیغی بیرینچیدن افغانستان و کیین ایسه پاکستان سفر قیلگن.
ایسلهتیب اوتهمیز، تورکیه استخبارات باشلیغی اوتگن کونی افغانستان گه کیلیب اسلام امیرلیگی استخبارات ادارهسی باشلیغی عبدالحق واثق، باش وزیر اداری اورین باسری مولوی عبدالغنی برادر، مدافعه وزیری مولوی محمدیعقوب مجاهد، ایچکی ایشلر وزیری خلیفه سراجالدین حقانی بیلن اوچرهشگن.
ابراهیم کالین، اسلام امیرلیگی عملدارلری بیلن افغانستان و تورکیه اورتهسیدهگی همکارلیکلر کینگهیتیریلیشی، امنیتی مسئلهلر، تروریزم گه قرشی کورهش، انسان قاچاقی همده منطقهده دوام ایتهیاتگن مسئلهلرنی محاکمه قیلگنی ایتیلگن.
