امریکا تشقی ایشلر وزیرلیگی گه کوره، اوشبو مملکت تشقی ایشلر وزیری مارکو روبیو، ۲۵ دن ۳۰ میزان گچه اوزبیکستان و هندوستان گه سفر قیله‌دی. او اوشبو سفری دایره‌سیده استراتیژیک، سودا و انرژی ساحه‌لریده بولگن همکارلیک‌لرنی کینگه‌یتیریش مسئله‌لری حقیده بحث ایتیشی ممکن.
امریکا تشقی ایشلر وزیرلیگی، بوگون (۲۲ میزان/۱۴ اکتوبر، چهارشنبه) بیر بیانیه ترقه‌تیب، روبیو سمرقند گه سفری دایره‌سیده «C5+۱» مملکتلر وزیرلری‌نینگ ییغیلیشیده هم اشتراک ایته‌دی و اوزبیکستان، قزاقستان، تاجیکستان، تورکمنستان و قرغیزستان ییریک عملدارلری بیلن اوچره‌شووی ممکن دیگن.
بیانیه گه کوره، امریکا تشقی ایشلر وزیرینی اوشبو سفر دوامیده ۲۰۰ دن آرتیق تدبیرکار همراه‌لیک قیله‌دی. سفردن مقصد امریکا و مرکزی آسیا مملکتلری اورته‌سیده‌گی سودا همکارلیک‌لرنی مستحکم‌لشدن عبارت.
روبیو اوزبیکستان‌دن کیین هندوستان گه باره‌دی و ممبی و جام‌نگر شهرلریده بو مملکت ییریک عملدارلری و سودا ساحه‌سیده رهبرلری بیلن اوچره‌شووی کوتیله‌دی.
امریکا تشقی ایشلر وزیرلیگی معلوم قیلیشیچه، اوشبو اوچره‌شوولر واشنگتن و ینگی دهلی اورته‌سیده استراتیژیک شیریک‌لیکنی مستحکم‌لش، منطقه‌وی و جهان اوزگریش‌لر یوزه‌سیدن فکر المه‌شیش همده انرژی، سرمایه کیریتیش و اقتصادی ساحه‌لرده‌گی همکارلیک‌نی کینگه‌یتیریش امکانیت‌لرینی کوریب چیقیش مقصدیده اوتکزیله‌دی.
