لیلما نوری اوستاخانه‌سینی ایش قوراللری آوازی و تاش‌لرنینگ یونیلیشیدن چیقه‌یاتگن تاووش‌لر تولدیریب توره‌دی. عیاللر دقت بیلن ایشلب و تاش‌لر گه شکل بیریشه‌دی. بو عیاللر اوچون تاش گه اویمه‌کارلیک قیلیش شونچه کی صنعت ایمس بلکی هنر اورگه‌نیش، درآمد تاپیش و عایله‌لریگه یاردم بیریش امکانیت دیر.
۲۸ یاشلی لیلما نوری بدخشان ولایتی مرکزی فیض‌آباد شهریده اوشبو اوستاخانه گه رهبرلیک قیله‌دی. او بو کسب‌نی کوپ ییللر اول اویمه‌کار استاذی قولیده شاگردلیک قیلیب اورگنگن. بیش-آلتی ییللیک تجربه‌دن سونگ اوز اوستاخانه‌سینی آچیشگه اولگورگن. او شونده‌ی دییدی: «بیش-آلتی ییل استاذلریم آلدیده ایشله‌دیم. شوندن سونگ اوزیم استاد بولدیم و اوستاخانه آچیشگه موفق بولدیم.»
نوری ۱۳۹۹ هجری-شمسی ییلده، تخمیناً ۱۵۰ مینگ افغانی سرمایه بیلن اوز اوستاخانه‌سینی ایشگه توشیرگن. اونینگ ایتیشیچه، سرمایه حجمی آشیب حاضرده قریب ۷۰۰-۸۰۰ مینگ افغانی گه ییتگن.
بیراق نوری بو اوستاخانه‌نی آچیشگه فقط تاش اویمه‌کارلیگی و زرگرلیک صنعتی گه بولگن قیزیقیشی سبب بولمه‌گن. او قیزلر گه هم اوشبو هنرنی اورگه‌نیش و شو آرقه‌لی درآمد تاپیش امکانیتینی یره‌تیشنی ایسته‌گن. اونگه کوره: «مقصدیم قیزلرنی هم اوشبو دستور گه جلب قیلیش ایدی. چونکی بو ینگی هنر و قیزلر هم اوندن بهره‌مند بولیشلری کیره‌ک.»
حاضرده اوشبو اوستاخانه‌ده بیر قطار عیاللر خادم، استاذ و شاگرد صفتیده فعالیت یوریتماقده. اولرنینگ ایریملری بو هنرنی عینن شو اوستاخانه‌ده اورگنگن و حاضر اوندن درآمد تاپه‌دیلر.
۲۰ یاشلی راحله احمدی انه شونده‌ی عیاللردن بیری دیر. او تخمیناً بیر یریم ییل اول اوشبو اوستاخانه‌ده تاش اویمه‌کارلیگینی اورگنگن و حاضر شو یونه‌لیشده ایشله‌ماقده. احمدی‌نینگ ایتیشیچه، او نازک و نفیس ایشلر گه بولگن قیزیقیشی طفیلی اوشبو کسب‌نی تنله‌گن. او شونده‌ی دییدی: «بو ایشگه علیحده قیزیقیشیم بار ایدی. تاش اویمه‌کارلیگی هم، زرگرلیک هم نازک هنرلر بولیب کتته مهارت طلب قیله‌دی.»
۲۱ یاشلی سیاه‌موی هم ایکی ییلدن بیری اوشبو اوستاخانه‌ده تاش اویمه‌کارلیگی بیلن شغللنه‌دی. او بو کسب‌نی درآمد تاپیش، ینگی کونیکمه‌لرنی اورگه‌نیش و اجتماعی علاقه‌لرینی کینگه‌یتیریش امکانیتی دیب بیله‌دی. «بو آرقه‌لی درآمد تاپه‌من و عایله‌م احتیاجلرینی قاندیریشگه یاردم بیره آله‌من. شونینگدیک بو ایش مینگه کوپراق کونیکمه‌لرنی اورگه‌نیش و اجتماعی علاقه‌لریمنی کینگه‌یتیریش امکانینی بیره‌دی» دییدی او.
بیراق، محصولات‌لرنی ساتیش بو عیاللر آلدیده‌گی اساسی معمالردن بیری دیر. اولر نفیس و صفتلی بویوملر ایشلب چیقریش اوچون حرکت قیله‌یاتگن بولسه‌لر-ده، کتته بازارلر گه اینیقسه، خارجی بازارلر گه چیقیش حلی هم قطار توسیق‌لر گه دوچ کیلماقده.
بدخشان عیاللر سودا و صناعت اتاقی باشلیغی شهره تمنا، سونگی ییللرده تورلی تشکیلات‌لر قیمت‌بها تاش‌لر و هنرمندچیلیک ساحه‌سیده فعالیت یوریته‌یاتگن عیاللرنی قوللب-قوتلش اوچون سعی-حرکتلر آلیب بارگنینی ایته‌دی. بیراق اولرنینگ محصولات‌لرینی اینیقسه خارجی بازارلرده ساتیشنی کینگه‌یتیریش اوچون ینه کوپراق چاره‌لر کوریش ضرور. او شونده‌ی دییدی: «حاضرگچه محصولات‌لریمیزنی خارج گه صادر قیلیش امکانینی بیره‌دیگن بیرارته رسمی بیتیم امضالنمه‌گن. بیز عیاللر اوز محصولات‌لری و ایشلب چیقرگن بویوملرینی خارج گه همده قوشنی ولایت‌لر گه یوباریش‌لری اوچون شرایط یره‌تیشگه حرکت قیله‌یپمیز.»
لیلما نوری اوستاخانه‌سیده عیاللر هنوز لاجورد و مرمر تاش‌لریگه ایشلاو بیریش بیلن شغللنماقده. بو صنعت اولرنینگ ایریملری اوچون درآمد تاپیش و کسب-هنر اورگه‌نیش امکانیتیگه ایلنگن. شونگه قره‌می، محصولات‌لرنی ساتیش بازارینی کینگه‌یتیریش اوشبو عیاللرنینگ فعالیتینی رواجلنتیریش اوچون مهم احتیاجلردن بیری بولیب قالگن.