اسلام امیرلیگی، افغانستان و پاکستان اورته‌سیده‌گی کیسکینلیکنی کمه‌یتیریشگه قره‌تیلگن دولتلرنینگ سعی-حرکتلرینی قوللب-قوتلشینی و بو باره‌ده همکارلیک قیلیشگه تیارگرلیگینی بیلدیرگن. بو بیانات امریکا تشقی ایشلر وزیری مارکو روبیو، واشنگتن ایکی دولت اورته‌سیده‌گی کیلیشماوچیلیک‌لرنی حل ایتیشده ایجابی رول اوینشگه تیار ایکنینی معلوم قیلگنیدن سونگ ینگره‌گن.
اسلام امیرلیگی سوزلاوچیسی ذبیح‌الله مجاهد سلام‌وطندار گه ایتیشیچه، کابل کیسکینلیکنی کمه‌یتیریش، برقرارلیکنی تأمینلش و منطقه‌وی خوفسیزلیک‌نی مستحکملش مقصدیده تشبث کورستگن هر قنده‌ی دولت‌نینگ سعی-حرکتلرینی قوللب-قوتله‌یدی.
اونینگ کوپه‌یتیریشیچه، اسلام امیرلیگی افغانستان و پاکستان اورته‌سیده‌گی کیلیشماوچیلیک‌لرنی حل ایتیشگه قره‌تیلگن واسطه‌چیلیک حرکتلریده اوز مسئولیتی دایره‌سیده همکارلیک قیلیشگه تیار. او شونده‌ی دییدی: «اسلام امیرلیگی دایما واسطه‌چیلرنینگ رولینی قدرلشگه و اولر بیلن همکارلیک قیلیشگه اینتیلیب کیلگن. شونینگدیک، یوزه گه کیلگن مسئله‌لر و نزاعلرنی تینچ یول همده ملاقات آرقه‌لی حل ایتیشگه حرکت قیلگن میز. بو باره‌ده همکارلیک قیله‌دیگن هر قنده‌ی دولت‌نی افغانستان قوللب-قوتله‌یدی و اوز مسئولیتی دایره‌سیده همکارلیک قیله‌دی.»
بو بیاناتلر، امریکا تشقی ایشلر وزیری مارکو روبیو، اوتگن کون جورجیا ایالتی، آتلانتا شهریده بولیب اوتگن ۲۰ گروه تشقی ایشلر وزیرلری ییغیلیشی دایره‌سیده بیرگن بیاناتیدن سونگ ینگره‌گن. اونینگ ایتیشیچه، واشنگتن پاکستان‌نینگ قوراللی گروه‌لر افغانستان حدودیدن توریب هجوملر اویوشتیره‌یاتگنی حقیده‌گی خواطرلرینی ایشیتگن و امکانیت بولسه، ایکی تامان اورته‌سیده‌گی کیسکینلیکنی کمهیتیریشده واسطه‌چیلیک قیلیشگه تیار. روبیو سوزلری بیر قسمی‌ده شونده‌ی دیگن: «اگر امریکا قوشمه ایالتلری پاکستان و افغانستان اورته‌سیده‌گی موجود معمالر همده کیسکینلیکنی حل ایتیشده ایجابی و ثمره‌لی رول اوینه‌ی آلسه، بو باره‌ده همکارلیک قیلیش و یاردم بیریشگه تیار.»
عینی پیتده، ایریم سیاسی تحلیلچیلر نفوذلی دولتلرنینگ کیسکینلیکنی کمه‌یتیریش جریانیگه قوشیلیشی دیپلماتیک ملاقات‌لرنی قیته تیکلش همده کابل و اسلام‌آباد اورته‌سیده‌گی کیلیشماوچیلیک‌لرنی حل ایتیش اوچون زمینه یره‌تیشی ممکن دیب حسابله‌یدیلر.
سیاسی تحلیلچی معین‌گل سمکنی‌نینگ ایتیشیچه، امریکا جدی سیاسی اراده کورستسه، کیسکینلیکنی کمهیتیریشده ثمره‌لی رول اوینه‌شی ممکن. اونگه کوره: «اگر امریکا کابل و اسلام‌آباد اورته‌سیده‌گی کیسکینلیکنی حقیقتن هم برطرف ایتیشنی ایستسه، بونگه قادر. بو دولت پاکستان‌نی قورال-یراغ و باشقه واسطه‌لر بیلن تأمینله‌یدی. برچه تامانلر شونی بیلیشی کیره‌ک که، افغانستان اولگیدیک ایمس. ملی، منطقه‌وی همده خلق‌ارا وضعیتدن کوپلب سباق آلگن.»
افغانستان و پاکستان اورته‌سیده‌گی کیسکین‌لیک سونگی ییللرده اساساً خوفسیزلیک مسئله‌لری، پاکستان حکومتی گه قرشی فعالیت یوریته‌یاتگن گروه‌لر همده چیگره‌‌ده‌گی هجوملر سبب کوچه‌یگن.
اسلام‌آباد پاکستان طالبان حرکتی (تی‌تی‌پی) افغانستان حدودیدن توریب پاکستان گه قرشی فعالیت یوریته‌یاتگنینی ادعا قیله‌دی. اسلام امیرلیگی ایسه بو ادعانی رد ایتیب، افغانستان حدودیدن باشقه بیرار دولت گه قرشی فایده‌لنیلیشیگه یول قویمسلیگینی تأکیدلب کیلگن.
