بلخ ولایتی محلی مسئوللری، اوشبو ولایت مرکزی مزارشریف شهریده یانغین طفیلی ۱۰۰ دن آرتیق دکان یانیب کیتگنینی معلوم قیله‌دیلر.
بلخ ولایتی تدبیرکارلر اتاقی باشلیغی میرویس احمدی گه کوره، اوشبو یانغین ۸ عقرب/۳۰ اکتوبر، جمعه کونی صادر بولگن و اونینگ نتیجه‌سیده ۱۳۵ دکان بوتونلی یانیب کیتگن و دکان ایگه‌لری ایسه آغیر مالیه‌وی ضرر کورگنلر.
یانغین، مزارشریف شهری روضه جنوبیده جایلشگن «باختر بازاری» سودا مرکزیده یوز بیرگن. اوشبو سودا مرکزیده کوپراق کییم-کیچک، بوت ساتووچی دکانلر و باشقه سیاحتی شرکتلر بولگن.
شو بیلن بیرگه، ایچکی ایشلر وزیرلیگی‌نینگ طبیعی آفت‌لر گه تیارگرلیک کوریش و اطفائیه باشلیغی نورالله انصار، یانغین بوتونلی اوچیریلگنیدن خبر بیرگن. اونینگ ایتیشیچه، زمانه‌وی اوسکونه‌لری یوقلیگی سبب یانغین کینگه‌یب کیتگن.
اوشبو سودا بازاریده دکانی بولگنلرنینگ ایتیشیچه، یانغین عاقبتیده کتته مادی ضرر کورگنلر. اولر کورگن ضررلرنی قاپلش اوچون اسلام امیرلیگیدن یاردم و همکارلیک سوره‌ماقده.
اوشبو حادثه آرتیدن یانغین سبب‌لرینی و ییتکزیلگن ضرر مقدارینی اورگه‌نیش مقصدیده کمیته توزیلگن. بیراق مادی ضررنینگ انیق مقداری حاضرگچه نامعلوم و بو باره‌ده‌گی تیکشیروولر دوام ایتماقده.
