خلیلالله ناصری، کمپیوترساینس یونهلیشینینگ بیرینچی کورس طلبهسی. اوقیشیم بیلن بیر قطارده، انگلیس تیلی اوقوو مرکزلریدن بیریده اوقیتووچی صفتیده هم فعالیت یوریتهمن و عزیز وطنداشلریمگه تعلیم بیریش همده خذمت قیلیش یولیده کیچیک بولسه-ده، اوز حصهمنی قوشیشگه حرکت قیلهمن.
بوگون سونگی ایکی ییل ایچیده حیاتیم، تعلیم و ایشیمگه کتته تأثیر کورستگن بیر تجربهم حقیده سوزلهماقچی من؛ بو – صنعی هوش بیلن تنیشیشیم و اونینگ شخصی همده کسبی حیاتیمدهگی قوللنیش امکانیتلرینی اورگنیش تجربهسی دیر. صنعی هوش نامینی ایلک بار ایشیتگنیمده، او حقیده انیق تصور گه ایگه ایمس ایدیم. اوشه پیتده دنیانینگ کوپلب مملکتلری و افغانستاندهگی آدملر هم بو تکنالوژیدن فایدهلنیشنی باشلهگن ایدی. اما مین حلی او حقیده ییترلی بیلیمگه ایگه ایمسدیم. بیر کونی تکنالوژی و علمی تدقیقات گه کتته قیزیقیشی بولگن دوستیم بیلن صحبتلشهیاتگنیمده گپ صنعی هوش حقیده کیتدی. او مینگه کوپلب سواللر گه جواب بیره آلهدیگن و تورلی ایشلرنی آسانلشتیرهدیگن واسطهلر یرهتیلگنینی توشونتیردی. اوشه صحبت حیاتیمده ینگی یولنینگ باشلنیشی اوچون تورتکی بولدی. مین اوزیم ایزلنیشگه قرار قیلدیم و صنعی هوش نیمه ایکنینی، قندهی ایشلهشینی همده نیگه بو حقده شونچهلیک کوپ گپیریلهیاتگنینی بیلیشگه حرکت قیلدیم. قنچه مطالعه قیلسم، دستلبکی تصوریمدن انچه کینگراق و مرکبراق بولگن بیر حادثه بیلن دوچ کیلهیاتگنیمنی انگلهدیم.
اولیگه مین صنعی هوش فقط کونگیلچیلر مقصدلر یا کی متن ترجمه قیلیش، املا خطالرینی توزهتیش یا کی بیر نیچه جمله یازیش کبی عادی ایشلرنی بجریش اوچون ایشله تیلهدی، دیب اویلردیم. بیراق اوندن اوزیم فایدهلنه باشلهگنیمدن سونگ، قرهشلریم اوزگردی. مین صنعی هوش عادی واسطه ایمسلیگینی، بلکی تعلیم، تدقیقات، وقتنی باشقریش، محتوا یرهتیش، دیزاین، ریجهلشتیریش و حتا حیاتدهگی مرکب معمالرنی حل قیلیشده انسانگه یاردم بیره آلهدیگن کتته تکنالوژی ایکنینی توشوندیم. مین تنیشگن بیرینچی واسطه – چتجیپیتی بولدی. دستلب اوندن کوپراق انگلیس تیلی درسلرینی اوتیشده فایدهلنردیم. هر سفر گرامتیکه، یازیش یا کی اوقوو مشقلرینی تیارلشده یاردمگه احتیاج سیزگنیمده، انیق، ساده و عملی جوابلر آلردیم. عینن شو تجربه مینگه بو تکنالوژی گه کوپراق ایشانچ حاصل قیلیشیمگه سبب بولدی و باشقه صنعی هوش واسطهلرینی هم اورگنیشگه کیریشدیم. وقت اوتیشی بیلن آلدیمده ینگی بیر دنیا آچیلدی. مین صنعی هوش یاردمیده گرافیک پستلر یرهتیشنی، درس تقدیماتلری اوچون پروفیشنل سلایدلر تیارلشنی، کانتینت (محتوا) یرهتیش اوچون ایجادی غایهلر تاپیشنی و حتا ویدیو یرهتیش همده تحریرلشده اوندن فایدهلنیشنی اورگندیم. مین اوچون صنعی هوش شونچه کی بیر دستور ایمس ایدی؛ او حیاتیمنینگ کوپلب لحظهلریده یانیمده بولگن همکار و یاردمچیگه ایلندی.
حاضرگه کیلیب، قریب ایکی ییلدن بیری صنعی هوشدن فایدهلنیب کیلماقده من و ایشانچ بیلن ایته آلهمن کی، بو تکنالوژی حیاتیمده کتته اوزگریشلر قیلدی. مین حس قیلگن اینگ مهم اوزگریش – وقتنی تیجش و اورگنیش صفتینینگ آشیشی بولدی. اوللری توشونیش اوچون ساعتلب وقت صرفلهگن موضوعلریم حاضرده انچه ساده و ترتیبلی توشونتیریشلر آرقهلی آسانراق انگلهشیلماقده. هر سفر مین اوچون بیرار درس قیین بولسه یا کی بیرار ایشنی بجریشده قیینچیلیککه دوچ کیلسم، توغری یولنی تاپیش اوچون صنعی هوشدن یاردم آلهمن. بعضاً درس بیریش، بیلیم یورتدهگی مشقلر و کوندهلیک مسئولیتلر سبب ریجهلریم بوزیلیب کیتهدی و چرچاقنی حس قیلهمن. شوندهی وضعیتلرده صنعی هوش مینگه کونلریم و هفتهلریم اوچون انیقراق ریجه توزیش، وظیفهلریمنی استوارلشتیریش و وقتیمنی یخشیراق باشقریش گه یاردم بیرهدی. البته، مین هیچ قچان صنعی هوشنی اوقیش، فکرلش و شخصی حرکتلریمنینگ اورنینی باسووچی واسطه دیب بیلمهیمن. حلی هم کتاب اوقیمن، تدقیق قیلهمن، سواللر بیرهمن و اورگنیش اوچون محنت قیلهمن. صنعی هوش مین اوچون استاذ، مصلحتچی و همکار دیر، اما مینینگ اورنیمگه فکرلهیدیگن واسطه ایمس. ایشانهمن کی، انساننینگ اوزی حرکت قیلمسه، هیچ قندهی تکنالوژی اونی حقیقی موفقیت گه آلیب باره آلمهیدی.
مینینگ فکریمچه، صنعی هوشنینگ اینگ کتته قدریتی شونده کی، او اورگنیش امکانیتلرینی همه اوچون آسانلشتیردی. بوگونگی کونده مین ایشانچلی معلوماتلر گه تیزراق ایگه بوله آلهمن، کوپلب سواللریمگه جواب تاپهمن و کیلهجک حقیده ینهده کینگراق فکر بیلن قرارلر قبول قیله آلهمن. بو تکنالوژی مینگه شونی اورگتدیکی، اگر اوندن توغری فایدهلنسک، او رواجلنیش، اورگنیش و تدقیقات اوچون کوپریک بوله آلهدی. یکونیده صنعی هوشد فایدهلنیشنی ایندیگینه باشلهگن، اینیقسه افغانستان یاشلریگه بیر خبر بیرماقچی من. صنعی هوش فکرلش و اوز حرکتینگیزنینگ اورنینی باسووچی واسطه صفتیده ایمس، بلکی یاردمچی واسطه صفتیده قرهنگ. اوندن اورگنیش، تدقیقات، وقتنی باشقریش و یخشیراق ییچیملر تاپیش اوچون فایدهلنینگ. بیراق هیچ قچان دنگسهلیک و قرهملیککه حرکت، ایجادکارلیک و تیریشقاقلیک اورنینی ایگللشیگه یول قویمنگ. کیلهجک بیلیم اورگنهدیگن و تکنالوژیلردن توغری فایدهلنه آلهدیگن انسانلرنیکی دیر.
