بدخشان ولایتینینگ ارگو، راغ و شغنان تومنلری ایریم اهالیسی، قیسقه مدت دوامیده تعلیم کورگن یا کی ییترلی تجربهسی بولمهگن شخصلر، قیشلاقلرده دارو خانه آچیب و کسللر گه اوز باشیمچهلیک شکلده دارو بیرهیاتگنلرینی ایتهدیلر.
بدخشان ارگو تومنیدن بولگن نازنین، قیشلاقلرده ایریم کیشیلر داروخانه آچیب، کسللر گه پیچکاری قیلهیاتگنینی ایتهدی. اونینگ سوزلریگه کوره، بو شخصلرنینگ ییترلی کونیکمه و تجربهلری یوق. اونینگ ایتیشیچه، قیشلاقدهگی داروخانهلردن بیریده پیچکاری آلگنیدن سونگ، ساغلیغی ینهده یامانلشگن. او شوندهی دییدی: «نیچه کون ایلگری کسل بولدیم و دوالنیش اوچون قیشلاقدهگی داروخانهلردن بیریگه مراجعت قیلدیم. اولر پیچکاری قیلیشدی، افسوس بیلن اوندن کیین قولیمده بعضی دانهلر تاپیلدی و ساغلیغیم آغیرلشدی.»
راغ تومنیدن بولگن احمدضیا شهابنینگ ایتیشیچه، قیشلاقلری طبی مرکزلردن اوزاقلیگی و اقتصادی قیینچیلیک سببلی، کوپینچه یشاوچیلر قیشلاقدهگی داروخانهلر گه مراجعت قیلهدیلر. اونگه کوره: «قیسقه مدت ایچیده تعلیم آلگن و ییترلی کونیکمه گه ایگه بولمهگنلرنینگ طبیات ساحهسیده فعالیت یوریتیشی آلدی آلینسه، چونکی اولر اوز باشیمچهلیک شکلده کسللر گه دارو بیریشهدی.»
شغنان تومنی یشاوچیسی بولگن هوشنگ، یشاوچیلر کوپینچه حالتلرده مسلک و مسلکسیز آدملرنینگ تانیمسلیگینی ایتهدی. او مسئوللردن داروخانه آچگنلرنینگ تعلیم سندی و فعالیت یوریتیش جوازینی تیکشیریب و مسلکسیز کیشیلر گه رخصت بیریلمسلیگینی سورهیدی. او شوندهی دییدی: «بعضی تومنلرده گواهمیز کی، طبیات ساحهسیده تجربهسی بولمهگن و مسلکسیز کیشیلر فعالیت قیلماقده. بو کتته قیینچیلیک و یشاوچیلرنینگ تشویشی گه سبب بولگن.»
شو بیلن بیرگه، بدخشانده شفاکار ذاکرالله کریمینینگ ایتیشیچه، تعلیم آلگن و مهارتلری یوقاری بولگن کشیلر کسللیکنی انیقلهی آلهدی و تخصصی بولمهگنلرنینگ فعالیت یوریتیشی کسللر سلامتلیگینی خطر گه دوچ قیلیشی ممکن. اونینگ کوپهیتیریشیچه: «ایریم تومنلرده آدملرنینگ اساسی تشویشلریدن بیری، ساغلیق بولیمیده مسلکسیز شخصلرنینگ فعالیت یوریتیشی و داروخانه آچیشی دیر. افسوس بیلن ییترلی بیلیمی و تخصصی بولمهگن شخصلر طبیات ساحهسیده فعالیت یوریتماقده. بو کسللرنی جدی قیینچیلیک بیلن دوچ قیلیشی ممکن.»
باشقه تاماندن، بدخشان ساغلیقنی سقلش ریاستی مسئوللری، طبی مرکزلر و داروخانهلر قاعدهلر گه موافق همده تخصصی بولگنلر تامانیدن عملگه آشیریلیشینی ایتهدیلر.
بدخشان ساغلیقنی سقلش ریاستی سوزلاوچیسی محفوظالله سلطانی گه کوره، بو ریاستنینگ تیکشیروچی تیملری طبی مرکزلر و داروخانهلردن نظارت ایتهدی و تخصصی بولمهگن شخصلر انیقلنگن حالده، اولر بیلن قانونی یاندهشیلهدی.
شو بیلن بیرگه، بدخشان یشاوچیلری اوزاق حدودلردهگی داروخانهلر و طبی مرکزلردن نظارت ایتیلیش جریانی آشیریلیب و زمانهوی واسطهلر بیلن جهازلنگن مرکزلر کوپهیتیریلیشینی سورهیدیلر.
