بدخشان ولایتی زیباک تومنی اهالیسی، اوشبو تومنده بیر کلینیک بار بولسه-ده، بیراق اولرنینگ برچه احتیاجلرینی حل قیله آلمسلیگینی ایتهدیلر. اولرنینگ ایتیشیچه، هر ییلی طبی مرکزلر اوزاقلیگی و سرکلر بوزوقلیگی سببلی جدی قیینیچیلیکلر گه دچار بولیشهدی.
زیباک تومنی «نیچمن» قیشلاغی یشاوچیلریدن بولمیش جمشید گه کوره، سرکلر بوزوقلیگی و ترانسپورت یوقلیگی سببلی کسللرینی دییرلی تورت ساعتلیک یولده نردبان آرقهلی طبی مرکز گه آلیب باریشگه مجبورلر.
کسلنینگ احوالی آغیر بولسه، احتمالاً یولده اوز جانینی قولدن بیریشی ممکن دییدی، جمشید. او شوندهی دییدی: «یوللر اوزاق امکانیت و موتر هم یوق مرکزده فقط بیر کلینیک بار، زمانهوی شکلده قوریلگن بولسه-ده صفت نقطهی نظردن ضعیف. یشاوچیلر تورلی قیینچیلیک بیلن دچار.»
بو مشکل بیلن فقط نیچمن قیشلاغی یشاوچیلر دچار ایمس، بلکی زیباک تومنی کوپینچه اوزاق حدودلر یشاوچیلری بوندهی معما بیلن روپهره دیر.
بدخشان زیباک تومنی سنگلیج قیشلاغی یشاوچیسی فرید، اوشبو قیشلاقدن طبی مرکز اوزاقلیگی و یوللر بوزوقلیگی سبللی، بو قیشلاق اهالیسی اوشبو قیشلاقدهگی کلینیکگه مراجعت قیلهدی لیکن اولرنینگ تولیق احتیاجلری حل بولمسلیگینی بیلدیرهدی.
اونینگ کوپهیتیریشیچه، حاضرگچه کوپینچه عیاللر امکانیتسیزلیک طفیلی اویلرده ولادت قیلهدی. او شوندهی دییدی: «سنگلیج و تومن مرکزی اورتهسیده قریب تورت ساعتلیک یول، ترانسپورت امکانیتی یوق و عیاللر کوپینچه قیینچیلیک بیلن دوچ و قیشلاقلرده اکثریت عیاللر اویلرده ولادت قیلهدی.»
شو بیلن بیرگه، زیباک تومنی یشاوچیلریدن بولمیش دوشنبهنینگ ایتیشیچه، حدودلریده کلینیک یوقلیگی هر ییلی اولرنی ایریم معمالر بیلن روپهره قیلهدی. کسللرینی تومن مرکزیدهگی کسلخانه گه آلیب باریشگه قوربلری ییتمهیدی و مسئوللردن بو قیینچیلیککه ییچیم یول تاپیش اوچون دقت قیلیشلرینی سورهیدی. اونگه کوره: «بیمارنی مرکز گه آلیب باریشگه قوربیمیز ییتمهیدی موتر اجاره آلماقچی بولسهی اوچ مینگ افغانی مبلغ عوضی گه آلیب بارهدی امکانیت یوق و یوللر هم بوزوق. کسللرنی نردبان آرقهلی کوپ قیینچیلیک بیلن آلیب بارهمیز.»
بدخشان ساغلیقنی سقلش ریاستی سوزلاوچیسی محفوظالله سلطانی گه کوره، زیباک تومنی مرکزیده مناسب امکانیتلر گه ایگه فقط بیر کلینیک بار، بیراق کیلهجکده بو تومن یشاوچیلریگه کوپراق طبی خذمت کورسهتیلیشی اوچون سعی-حرکت قیلینماقده. او شوندهی دییدی: «ینه هم ریجهمیز بار کیلهجکده زیباک ده زمانهوی طبی مرکز قوریش اوچون بیراق بودجه آز و اوز سعی-حرکتیمیز قیلهمیز.»
تاغلی و ساووق زیباک، بدخشان ولایتی مرکزی فیضآباد شهریدن ۱۲۰ کیلومتر اوزاقده جایلشگن تومنلردن حسابلنهدی.
بدخشان، مملکت شمالشرقی جملهدن ساووق و افغانستاننینگ تاغلی ولایتلریدن بولیب و اونینگ اوزاقده جایلشگن تومنلر اهالیسی ترانسپورتی امکانیت آزلیگی و یوللری بوزوقلیگی سببلی طبی خذمتلردن اساسی شکلده فایدهلنه آلمهیدی.
