ایریم عیاللر تورلی خیل ساغلیق معمالرینی جمله‌دن حُسن‌بوزر، تیری‌نینگ حددن تشقری یاغلنیشی، موشَک آغریقلری، بیل آغریغی و جسمانی چرچاق‌نی برطرف ایتیش مقصدیده حجامت قیلیشگه مراجعت قیله‌دیلر. بو عنعنوی دوالش اصولی بوگونگی کونده هم ایریم انسانلر آره‌سیده اوز اهمیتینی سقلب کیلماقده.
بو عیاللر، حجامت معالجه‌سیدن سونگ اوز تنه‌سی اینیقسه تیری حالتیده ایجابی اوزگریشلرنی کوزه‌تگنینی ایته‌دیلر؛ بیراق شفاکارلر اوشبو اصول‌نینگ تورلی کسللیک‌لرنی دوالشده ثمره‌دارلیگی و احتمالی ضررلری حقیده ایضاح کیریته‌دیلر.
حجامت عنعنوی طبابت‌نینگ قدیمی اصوللریدن بیری بولیب، اونده مخصوص ایدیشلر یاردمیده تیریده مکش حاصل قیلینه‌دی. اوشبو اصول اساساً ایکی تور گه – قوروق و هول حجامت گه بولینه‌دی. هول حجامت جریانیده تیری یوزه‌سی کیچیک کیسیکلر بیلن تیرنله‌دی و تنه‌دن معلوم مقدارده قان چیقریله‌دی. شفاکارلرنینگ فکریچه، طبی قاعده‌لریگه رعایه قیلینمسه یا کی بو معالجه تیز-تیز تکرارلنسه، عفونت، یره و کم‌قانلیک کبی خوفلرنی کیلتیریب چیقریشی ممکن.
مریم، مزارشریف شهریدن بولیب، بیر نیچه ییل دوامیده یوزیده‌گی حُسن‌بوزر و تیری معمالریدن اذیت چیکنینی ایته‌دی. او دوگانه‌لری‌نینگ مصلحتی بیلن حجامت‌نی سینب کوریشگه قرار قیلگن. اونینگ ایتیشیچه، اوشبو معالجه‌دن سونگ تیریسی‌نینگ حالتی یخشی‌لنگن. او شونده‌ی دییدی: «ایکی مرته حجامت قیلدیردیم. یوزیمگه ایپ بیلن توک آلدیرگنیمده بخار پیدا بولردی. دوگانه‌لریم مصلحتی بیلن حجامت قیلدیردیم. شوندن کیین احوالیم یخشی‌لندی. حجامت‌دن کیین بیر نیچه کون یره ایزلری سقلنیب توردی، کیین ایسه یوقالدی.»
کابل ولایتیدن بولگن ۲۱ یاشلی صدف صافی هم، بیر نیچه بار جلدی شفاکار گه مراجعت قیلگنی، بیراق دوالنیشدن نتیجه آلمه‌گچ، حجامت‌نی سینب کورگنینی ایته‌دی. او اوشبو معالجه‌دن سونگ تیریسی‌نینگ حالتی یخشی‌لنگنی، اوزینی یینگیل حس قیلگنی و چرچاق کمه‌یگنینی بیلدیره‌دی. اونگه کوره: «یوزیمده جوده کوپ تاشمه (بخار) بار ایدی. جلدی شفاکار گه بیر نیچه بار مراجعت قیلگن بولسم-ده، معما حل بولمه‌دی. شوندن سونگ حجامت قیلیشنی توصیه قیلیشدی. مین اوچ-تورت مرته حجامت قیلدیردیم و نتیجه‌ده یوزیمده‌گی تاشمه‌لر بوتونلی یوقالدی.»
حجامت گه مراجعت قیلگن عیاللرنینگ تجربه‌لریدن تشقری، حجامت خذمت‌لرینی کورسه‌تووچی مرکزلر هم مجازلرنینگ مراجعت قیلیش سبب‌لری، اولرنی تیکشیریش اسلوبی و طبی قاعده‌لر رعایت ایتیلیشی حقیده معلومات بیره‌دیلر.
کابل‌ده حجامت کلینیک‌لریدن بیری‌نینگ مدیری محمدیوسف کاکرنینگ ایتیشیچه، عیاللر اوشبو مرکز گه تورلی ساغلیق معمالری جمله‌دن تیری کسللیک‌لری، حُسن‌بوزر، تیری‌نینگ یاغلنیشی، موشک آغریقلری و جسمانی چرچاق سببلی مراجعت قیلیشه‌دی. اونینگ تأکیدلشیچه، ایریم مجازلر حجامت‌دن سونگ موشک آغریقلری کمه‌یشی، اوزلرینی ینه‌ده خاطر جمع و یینگیل حس قیلیشنی کوتیشه‌دی. او شونده‌ی دییدی: «عیاللر تورلی خیل ساغلیق معمالری سببلی مراجعت قیلیشه‌دی. بولر جمله‌سیگه تیری معمالری، مثلاً میده تاشمه‌لر، حسن‌بوزر و تیری‌نینگ حددن تشقری یاغلنیشی کیره‌دی. شونینگدیک، قانده‌گی یاغ مقداری‌نینگ یوقاریلیگی، موشک آغریقلری، بیل آغریغی، جسمانی چرچاق، تنه‌ده‌گی آغیرلیک حسی، روحی و عصبی زوریقیشلر هم مراجعت قیلیش سبب‌لریدن حسابلنه‌دی.»
آزاد قاسمی، حجامت بیلن شغللنووچی متخصص‌لردن بیری، طبی قاعده‌لریگه رعایه قیلیش همده تازه و بیر مرته‌لیک واسطه‌لردن فایده‌لنیش مهم‌لیگینی تأکیدله‌یدی. اونینگ ایتیشیچه، حجامت قیلدیرگن شخص‌لر بیر نیچه کون دوامیده آغیر جسمانی مشقلر بیلن شغللنمسلیک‌لری، سونا کبی جوده ایسیق جایلر گه بارمسلیک‌لری و حجامت‌دن کیینگی پرورش بوییچه توصیه‌لر گه عمل قیلیشلری کیره‌ک. اونگه کوره: «حجامت جریانیده ایشلتیله‌دیگن برچه واسطه‌لر استریل و بیر مرته‌لیک بولیشی شرط. بو جوده مهم و حیاتی مسئله بولیب، هر بیر حجامت مرکزی بونگه علیحده اعتبار قره‌تیشی کیره‌ک. حجامت‌دن کیین بیریله‌دیگن توصیه‌لر گه کوره، بیر نیچه کون دوامیده پروتین گه بای آزیق-آوقتلرنی استعمال قیلمسلیک لازم. سپورت بیلن منتظم شغللنه‌دیگن کیشیلر مشغولات‌لر گه تنفس بیریشلری، شونینگدیک، حجامت‌دن کیینگی بیر نیچه کون دوامیده سونا و جوده ایسیق محیط‌لردن سقلنیش‌لری کیره‌ک.»
کوکبه نواب، جلدی کسللیک‌لر شفاکاری ایتیشیچه، حُسن‌بوزر و تیری‌نینگ یاغلنیشینی حجامت قیلیش آرقه‌لی دوالش ثمره‌دارلیگینی تصدیقلاوچی ییترلی علمی دلیللر یوق. اونینگ تأکیدلشیچه، حجامت کوکریش، یره، یلیغلنیش، تیری رنگی‌نینگ اوزگریشی و التهاب سبب بولیشی ممکن. قان چیقریش آرقه‌لی عملگه آشیریله‌دیگن حجامت تکراراً بجریلسه، کم‌قانلیک خوفی هم آرته‌دی. شونینگدیک او، تیری معمالریدن اذیت چیکه‌یاتگن کیشیلر گه دوالش اصولینی تنلشدن آلدین معمانینگ اصل سببینی انیقلش اوچون جلدی شفاکار گه مراجعت قیلیشنی توصیه ایته‌دی. او شونده‌ی دییدی: «می‌نینگ توصیه‌م شو کی، حجامت‌نی اساسی دوالش اصولی یا کی علمی طبیات گه مقابل واسطه صفتیده قبول قیلمسلیک کیره‌ک. اگر انسان‌ده حُسن‌بوز، تیری بخارلری یا کی تیری‌نینگ حددن تشقری یاغلنیشی کوزه‌تیلسه، اینگ توغری یول – جلدی شفاکار گه مراجعت قیلیش دیر.»
حجامت – عنعنوی دوالش اصوللریدن بیری بولیب، حاضرگچه ایریم عیاللر و ایرکک‌لر تورلی ساغلیق معمالرینی برطرف ایتیش مقصدیده اوندن فایده‌لنیب کیلماقده. ایریم مراجعتچیلر اوشبو معالجه‌دن سونگ ایجابی نتیجه‌لرنی حس قیلگن‌لیکلرینی ایتیشه‌دی. بیراق بونده‌ی تجربه‌لرنینگ اوزی حجامت‌نینگ کسللیک‌لرنی دوالشده‌گی ثمره‌دارلیگینی اثباتلمه‌یدی. شفاکارلر هر قنده‌ی دوالش اصولینی تنلشدن آلدین ساغلیق معمالری‌نینگ سببینی انیقلش، احتمالی عوارض تأثیرلردن خبردار بولیش همده طبی قاعده‌لریگه رعایه ایتیش مهم‌لیگینی تأکیدله‌یدیلر.
