فاریاب ولایتی‌نینگ تورلی حدودلریده ایریم چاروادارلرنینگ ایتیشیچه، یاغینگرچیلیک‌نینگ کمه‌یشی و ییلاولرنینگ قوریب قالیشی چاروا ماللرینی باقیش اوچون ایریم قیینیچیلیک بیلن دوچ بولگنلر.
فاریاب ولایتی کوهستان تومنی یشاوچیسی بولگن غلام‌حضرت‌نینگ ایتیشیچه، قوروقچیلیک و ییلاولرنینگ کمه‌یشی چاروالری‌نینگ آذوقه‌سینی تأمینله‌ی آلمسلیککه سبب بولگن. اونگه کوره: «بو ییل اولگی ییللر گه نسبتن جوده کتته اوزگریش بولدی. چونکی حیوانلر آذوقه‌سی کم ایدی و آفت هم ضرر ییتکزدی، یامغیر هم ییترلیچه یاغمه‌دی و همه جای قوریب قالدی، حتا بوغدای هم قوریدی. قوی‌لریمنی ییلاو گه آلیب چیقگنیمیزده، چاروا ماللر آوقتلنیشی اوچون هیچ نرسه تاپیلمه‌یدی.»
فاریاب ولایتی‌نینگ پشتون‌کوت تومنیدن بولگن چاروادار محمدآچل‌نینگ ایتیشیچه، سونگی ییللرده ییلاولر و آذوقه ییتیشمسلیگی سببلی اونینگ چاروا ماللری‌نینگ بیر قسمی ضعیف‌لشگن. او شونده‌ی دییدی: «سونگی ییللرده آذوقه ییتیشمسلیگی سببلی چاروا ماللریمیز ضعیفلشدی و تورلی کسللیکلر گه چلیندی. بوندن تشقری، اوتگن ییللرده هم ایریم کسللیکلر طفیلی ۱۵ باش ایچکی و قوی تلف بولدی. اگر بو چاروا ماللریدن ایریلسم، بیز کتته ضرر کوره‌میز.»
چاروادارلرنینگ کوپه‌یتیریشیچه، ییلاولرنینگ کمه‌یشی و چاروا ماللری‌نینگ ضعیف‌لشیشی اولرنینگ تیریکچیلیگیگه سلبی تأثیر کورسته‌دی. اولرنینگ فکریچه، حکومت اوشبو معمانی حل ایتیش چاره‌لرینی کوریشی لازم.
باشقه تاماندن، فاریاب ولایتی ایکینچیلیک و چارواچیلیک اداره‌سی، حیوانلر آره‌سیده کسللیکلر ترقه‌لیشی‌نینگ آلدینی آلیش مقصدیده چاروا ماللرینی ایملش کمپاینینی باشله‌گنینی معلوم قیله‌دی. اوشبو اداره‌نینگ چارواچیلیک و حیوانلر سلامتلیگی بولیمی باشلیغی محب‌الله قادری‌نینگ ایتیشیچه، جاری قویاش ییل‌نینگ باشیدن حاضرگچه ۴۹۶ مینگ باش چاروا ماللری ایملنگن. او شونده‌ی دییدی: «چاروالر قوروقچیلیک و آذوقه آزلیگی معمالریگه دوچ کیله‌یاتگن شرایط‌ده هر بیر باش چاروا مالینی سقلب قالیش کتته اقتصادی اهمیت گه ایگه. شو سببلی ایملش، کسللیک‌لرنینگ آلدینی آلیشگه قره‌تیلگن مهم چاره‌لردن بیری دیر.»
چاروا ماللرینی منتظم ایملش، اولرنی آذوقه بیلن تأمینلش، طبی قاعده‌لریگه رعایه قیلیش همده چاروا ماللرینی سقلش اوچون مناسب جای یره‌تیش چاروادارلرنینگ اقلیم اوزگریشی عاقبتلری آلدیده‌گی ضعیف‌لیگینی کمه‌یتیریشگه یاردم بیره‌دیگن چاره-تدبیرلر دیر.
فاریاب ولایتی ساغلیق‌نی سقلش ریاستی‌نینگ وترنری و حیوانلر سلامتلیگی بوییچه مسئولی ارسلان حیدری‌نینگ ایتیشیچه: «بروسلوز کسللیگی جمعیتی‌میزده سیگیر یا کی حیوانی مرض کسللیگی نامی بیلن هم تنیلگن. بروسلوز کسللیکلر جمله‌سیگه کیره‌دی یعنی انسان و حیوانلر اونگه چلینه‌دی. بروسلوز جوده خوفلی، چونکی او آدمگه هم یوقه‌دی. چاروادارلر چاروا ماللرینی پرورش قیلیش وقتیده شخصی و اطراف-محیط تازه‌لیگیگه رعایه قیلیشلری لازم.»
مالدارلیک بوییچه متخصص جمعه‌خان شریفی شونده‌ی دییدی: «چاروادار اینگ یخشی نسل‌نی تنلشی کیره‌ک. یعنی قیسی ذات اوزی اوچون ماس ایکنینی و اوندن کوپراق محصولات آلیش ممکن‌لیگینی بیلیشی لازم. ایکینچیدن، چاروا ماللرینی سقلش اوچون مناسب جایگه ایگه بولیشی کیره‌ک. چونکی حیوان مناسب شرایط‌ده سقلنمسه، طبیعی کی کسل بولیب و تلف بولیشی ممکن.»
فاریاب ولایتیده قوروقچیلیک و آذوقه تنقیص‌لیگی چاروادارلر اقتصادیاتیگه جدی ضرر ییتکزماقده. بو ایسه اولرنی چارواچیلیک ساحه‌سیگه قوشیمچه، سرمایه کیریتیشدن واز کیچیشگه مجبور قیله‌دی.
