اسلام امیرلیگی عالی اوقوو وزیری شیخ ندامحمد ندیم، بوگون (۲۶ سنبله/۱۷ سپتمبر، پنجشنبه) کابلده «برم» نامی آستیده خصوصی نوآورلیک و تدقیقات مرکزی آچیلیش مراسمیده ایتیشیچه، علم-فن و تدقیقاتلرنی رواجلنتیریش، ایشسیزلیک و اجتماعی معمالرنی کمهیتیریش گه سبب بولهدی.
او، تدقیقاتچیلرنی مملکتده جهالت درجهسینی کمهیتیریش مقصدیده دینی و زمانهوی فنلر ساحهسیده علمی ایزلنیشلر گه کوپراق اعتبار قرهتیشلرینی سورهگن. او شوندهی دییدی: «افغانستانده جهالتنی کمهیتیریش اوچون دینی و عصری بیلیم ساحهلریده تدقیقات اوتکزیلیشی گه کوپراق دقت قیلینسه.»
اوشبو نوآورلیک و تدقیقات مرکزی، اسلام امیرلیگی رسمیلری، تدقیقاتچیلر و بیلیم یورت اوقیتووچیلرینینگ اشتراکی بیلن، بوگون کابلده آچیلدی.
شو بیلن بیرگه، اوشبو خصوصی تدقیقات مرکزینینگ اجرائیه باشلیغی محمدبشیر ظفری، مرکزنی تشکیل ایتیشدن مقصد افغانستاننینگ اجتماعی و اقتصادی احتیاجلری، امکانیتلری همده معمالرینی انیقلش و تحلیل قیلیشدن عبارت ایکنینی بیلدیرگن. او شوندهی دیگن: «تدقیقات و نوآورلیک مرکزینی تشکیل ایتیشدن مقصد – افغانستاننینگ اجتماعی و اقتصادی احتیاجلری، امکانیتلری و معمالرینی انیقلش همده تحلیل قیلیش، عملی و قیاسی تدقیقاتلر همده استراتیژیک ایزلنیشلر آلیب باریش، شونینگدیک تدقیقات نتیجهلریگه اساسلنگن علمی ییچیملر و سیاست گه یونهلتیریلگن تکلیفلرنی تقدیم ایتیشدن عبارت.»
بیراق، اسلام امیرلیگی اقتصاد وزیرلیگینینگ مسلک بوییچه معینی عبداللطیف نظری، بو دستورده افغانستان معمالرینی حل ایتیش اوچون عملی تدقیقاتلر اوتکزیلیشینی ضرورت دیب اقتصادیات، زراعت و تکنالوژی ساحهلریده علمی تدقیقات اوتکزیلیشیگه تأکید ایتگن. اونینگ ایتیشیچه: «افغانستان اقلیم اوزگریشی و آزیق-آوقت خوفسیزلیگی کبی معمالر بیلن دچار و تدقیقات مرکزلری بونگه عملی ییچیملر تاپیشی کیرهک.»
عالی اوقوو وزیرلیگینینگ معلوماتلریگه کوره، حاضرده قریب ایکی مینگ نفر افغان طلبهسی خارجده ماسترلیک و دکتورا درجهلریده تحصیل آلماقده. بو وزیرلیک رسمیلرینینگ ایتیشیچه، تدقیقات مرکزلریده ملَکهلی استادلر و متخصصلرنینگ علمی تجربهلریدن فایدهلنیش کیرهک.
