مین صیام اکبری من؛ خصوصی بیلیم یورتلردن بیرینینگ کمپیوتر ساینس یونهلیشیده بیرینچی باسقیچ طلبهسی بولیب اوقیمن. بیلیم یورتدهگی درسلر بیلن بیر قطارده، تعلیم مرکزلریدن بیریده جرمنی تیلینی هم اورگنماقده من. ایلک ییللردن باشلب تکنالوژیگه و زمانهوی واسطهلر گه علیحده قیزیقیشیم بولگن و هر دایم دیجیتال امکانیتلردن یخشیراق اورگنیش همده علمی رواجلنیش اوچون فایدهلنیشگه حرکت قیلگن من.
صنعی اینتلیکت (هوش مصنوعی) نامینی ایلک بار اجتماعی ترماقلر آرقهلی ایشیتگن من. فیسبوک، اینستاگرام و باشقه پلتفرمهلرده بو تکنالوژی حقیده کوپلب ویدیولر و مقالهلر اعلان قیلینردی. اوشبو ویدیولرنی تماشا قیلگنیمده، اینگ اولا حیرت گه توشردیم. بیر دستور قندهی قیلیب سواللر گه جواب بیریشی، متنلرنی ترجمه قیلیشی، معلوماتلرنی قیسقرتیریب بیریشی و حتا تورلی کونیکمهلرنی اورگنیشده انسانلر گه یاردم بیریشی مینگه جوده قیزیق تویلردی. اوشه پیتده صنعی اینتلیکت مین اوچون کوندهلیک فایدهلنهدیگن واسطهدن کوره، کیلهجکدن کیلگندیک تویلردی.
بیر مدت اوتگچ، کوپلب دوستلریم و تنیشلریم اوشبو تکنالوژیدن فایدهلنهیاتگنینی بیلدیم. بو ایسه قیزیقیشیمنی ینهده آشیردی و اوزیم هم اونی سینب کوریشگه قرار قیلدیم. دستلب اوندن فایدهلنیشیم جوده چیکلنگن ایدی. اساساً بیر نیچه سوزنی ترجمه قیلیش، ایریم اتمهلرنینگ معناسینی توشونیش یا کی عادی سواللر بیریش اوچون مراجعت قیلردیم. توغریسینی ایتسم، اوشه کونلرده صنعی اینتلیکتنینگ جوابلریگه حلی تولیق ایشانمسدیم و اوندن احتیاطکارلیک بیلن فایدهلنردیم. بیراق وقت اوتیشی بیلن بو تکنالوژی حقیدهگی توشونچهم کینگهیدی. استه-سیکین صنعی اینتلیکت فقط ترجمان یا کی عادی جواب بیروچی ایمسلیگینی انگلهدیم. او مرکب موضوعلرنی توشونیشده، ریجهلشتیریشده، معلوماتلرنی تحلیل قیلیشده و حتا ینگی کونیکمهلرنی اورگنیشده هم مهم رول اوینشی ممکن ایکن. شو سببلی اوندن فایدهلنیش دایرهم کینگهیدی و او کوندهلیک تعلیم فعالیتیمنینگ مهم قسمیگه ایلندی.
حاضر قریب ایکی ییلدن آرتیق وقت دوامیده صنعی اینتلیکتدن فایدهلنیب کیلماقده من. بو دور ایچیده او اورگنیش یولیمدهگی دایمی همراهلریمدن بیریگه ایلندی. اینیقسه جرمنی تیلینی اورگنیشده اونینگ حصهسی کتته بولدی. قچانکی ینگی سوز، گرامتیک توزیلمه یا کی مرکب متن گه دوچ کیلسم، اوندن یاردم سورهب، موضوعنی توشونیشنی آسانلشتیرهدیگن ایضاحلر آلهمن. بیلیم یورتدهگی اوقیشلریمده هم صنعی اینتلیکتدن کینگ فایدهلنه من. بعضاً اوزون اوقوو متنلرینی قیسقرتیریش، بعضاً تعلیم منبعلرینی تاپیش، بعضاً ایسه درسلرده اوتیلگن توشونچهلرنی یخشیراق انگلش اوچون اوندن یاردم آلهمن. شونینگدیک، تدقیقاتلر آلیب باریشده، مطلبلرنی کوریب چیقیشده و ینگی موضوعلر بیلن تنیشیشده هم بو تکنالوژی مین اوچون فایدهلی و قولی واسطه گه ایلندی. مینینگ فکریمچه، صنعی اینتلیکتنینگ اینگ کتته افضللیکلریدن بیری – اورگنیش جریانینی تیزراق و مقصدلیراق قیلیش دیر. ایلگری جوابینی تاپیش اوچون ساعتلر طلب قیلینهدیگن کوپلب سواللر گه ایندی قیسقه وقت ایچیده جواب آلیش ممکن. بوندن تشقری، صنعی اینتلیکت مرکب موضوعلرنی ساده تیلده توشونتیریب بیره آلهدی و طلبهلر گه تورلی مسئلهلرنی چقورراق انگلشده یاردم بیرهدی.
شو بیلن بیرگه، مین صنعی اینتلیکتدن آنگلی و مسئولیتلی طرزده فایدهلنیش کیرهک دیب حسابلهی من. بو تکنالوژی جوده کوچلی بولسه-ده، انساننینگ فکرلشی، ایجادکارلیگی و شخصی محنتنینگ اورنینی باسه آلمهیدی. مین هر دایم آلگن جوابلریمنی تیکشیریش گه حرکت قیلهمن و فقط اولرگه تیهنیب قالمهی من. صنعی اینتلیکت بیلن ایندیگینه تنیشهیاتگن یاشلر و باشقه انسانلر گه مراجعتیم شو کی، بو تکنالوژیدن قورقمنگلر، لیکن اونگه حددن تشقری قرهم بولیب هم قالمنگلر. صنعی اینتلیکت اورگنیش، شخصی رواجلنیش و کونیکمهلرنی آشیریش اوچون کوچلی یاردمچی بولیشی ممکن. اما اونینگ حقیقی قیمتی انسان اوندن فکرلشنینگ اورنیگه ایمس، بلکی یاردمچی واسطه صفتیده فایدهلنگنده نمایان بولهدی. اگر بو تکنالوژیدن توغری و مسئولیت بیلن فایدهلنیلسه، او نهفقط علیحده شخصلرنینگ رواجلنیشی، بلکی جمعیتلرنینگ ترقیاتی اوچون هم کتته امکانیتلر یرهتیشی ممکن.
