بیرلشگن ملتلر تشکیلاتی باشکاتبی آنتونیو گوترش، اقلیم واقعهلری طفیلی تلفاتنی کمهیتیریشده تیزلیککه آگاهلنتیریش تیزیملرینینگ مهم اورنیگه تاکیدلب و ایتیشیچه، صنعی هوش آگاهلنتیریشلرنینگ تیز، انیق و فایدهلی شکلده اهالیگه ییتیشتیریب و انسانلر حیاتینی قوتقره آلهدی.
گوترش بوگون (۲۶-سرطان/۱۷-جولای، جمعه)، اکس صحیفهسیده ترقهتگن پیامیده، تیزلیککه آگاهلنتیریش تیزیملرینی «اقلیم آفتلریدن حمایهلنیشنینگ اینگ تیجمکار واسطهسی» دیب و کوپهیتیریشیچه، اوشبو تیزیملرنینگ کینگ کولملی شکلده فعال بولگن حدودلرده، آفتلر طفیلی اولگنلر سانی کمیده آلتی برابر کمراق دیر.
بیرلشگن ملتلر تشکیلاتی باشکاتبینینگ آگاهلنتیریشیچه، مذکور تیزیملرنینگ اهمیتیگه قرهمهی، دنیا جمعیتینینگ قریب اوچدن بیر قسمی حاضرگچه تیزلیککه آگاهلنتیریش تیزیملری امکانیتیدن فایدهلنه آلمهیدی؛ بو موضوع ایسه سوو تاشقینلر، بورانلر، ایسیقلیک و باشقه اقلیم بوییچه کوچلی واقعهلر برابریده میلیونلب انساننینگ جبرلنیشینی کوپهیتیرهدی.
او، صنعی هوش اورنینی مهم دیب و ایتیشیچه، بو تکنولوژی آگاهلنتیریشلر و معلوماتلرنی آز وقتده و کوپینچه دقت بیلن تولید قیله آلهدی.
«برچهگه تیزلیککه آگاهلنتیریش» دستوری، ۲۰۲۲-ییلده آنتونیو گوترش آرقهلی یولگه قوییلیب و اقلیم اوزگریشلری طفیلی یامان واقعهلر کوپهیشیگه جواب بیریش اوچون دیزاینلنگن. بو دستورنینگ اینگ مهم مقصدی، ۲۰۲۷-ییل یکونیگچه ییر سیارهسیدهگی برچه کیشینینگ هوا و یشش محیط خوفلری برابریده سقلهنیش دیر.
