مین سحر رحیمی من. مین هم کوپلب تینگداشلریم کبی کیله‌جک اوچون کتته آرزولری بار قیز ایدیم. مکتب‌نی تمامله‌گنیمدن سونگ، کانکور اوچون بار کوچیم بیلن تیارلندیم. مقصدیم انیق ایدی؛ انگلیس تیلی و ادبیاتی فاکولته‌سیده تحصیل آلیشنی خواهلردیم. نتیجه‌لر اعلان قیلینگنده و اوقیشگه قبول قیلینگنیمنی بیلگنیمده گویا بوتون دنیا مینگه بیریلگندیک حس قیلدیم. امیدیم کوپ ایدی و کیله‌جگیمنی قوریش اوچون عالی تعلیم یولینی باشلش‌نی ایستردیم. بیراق همه‌سی مین اویله‌گندیک کیچمه‌دی. بیلیم یورت‌لر قیزلر اوچون یاپیلگچ، بو کتته و حیاتی مهم امکانیت میندن جوده کوتیلمه‌گنده تارتیب آلیندی.
بو وضعیت‌نی قبول قیلیش مین اوچون اصلا آسان بولمه‌دی. مین دایما تعلیم آلیشنی، اورگه‌نیشنی و رواجلنیشنی یخشی کورردیم، اما بیردن اوزیمنی باشی بیرک کوچه‌ده قالگندیک حس قیلدیم. لیکن بیر یول یاپیلسه، رواجلنیشگه بولگن امیدنی یوقاتمسلیک کیره‌ک دیب ایشانردیم. اوزیمگه: «توخته‌ب قالمسلیگیم کیره‌ک. حلی قالگن هر قنده‌ی امکانیتدن فایده‌لنیشیم و بیلیم آلیش‌نینگ باشقه یوللرینی تاپیشیم کیره‌ک» دیدیم. عینن شو ایزلنیشلر دوامیده بوگونگی کونده کوپلب انسانلرنینگ حیاتینی اوزگره‌یاتگن ینگی واسطه – یسمه عقل بیلن تنیشدیم.
بیز تکنالوژی جدل صورت‌لر بیلن رواجلنه‌یاتگن دورده یشه‌یپمیز. بیر نیچه ییل اول بیز اوچون معجزه یا که علمی-فنتستیک حکایه‌لردیک توییلگن واسطه‌لر بوگون کونده‌لیک حیاتی‌میزنینگ بیر قسمیگه ایلنگن. یسمه عقل ایندیلیکده بیزنینگ تعلیم آلیش، ایشلش و حتا فکرلش اسلوبی‌میزنی هم اوزگرتیرماقده. مین هم بو حادثه بیلن استه-سیکین تنیشه باشله‌دیم. دستلب یسمه عقل‌نی عادی قیدیرو تیزیمی یعنی عادتی سواللر گه جواب بیره‌دیگن واسطه دیب اویلردیم. بیراق اوشبو تکنالوژینی اوزیم سینب کوریب اوندن عملده فایده‌لنه باشله‌گنیمده، اونینگ امکانیت‌لری بوندن انچه کینگ ایکنینی انگله‌دیم.
یسمه عقل‌نینگ حیاتیمگه اینگ کتته تأثیری تعلیم ساحه‌سیده بولدی. مین انگلیس تیلینی اورگه‌نیشگه چنقاق ایدیم، ایندی اوییمده کون بویی مینگه سباق بیره‌دیگن استاذیم بار ایدی. یسمه عقل کبی واسطه‌لر مین اوچون یاردمچی کوچ گه ایلندی. هر سفر مرکب گرامر قاعده گه یا که توشونیشیم قیین بولگن اوقوو متنی گه دوچ کیلسم، یسمه عقل‌دن اونی امکان قدر ساده تیلده و کوپلب مثاللر یاردمیده توشونتیریب بیریشینی سوره‌یمن. بو اصول مینگه اوزیمگه بولگن ایشانچ‌نی آشیریب، قورقمسدن اورگه‌نیشده دوام ایتیشیمگه یاردم بیره‌دی. اوشبو واسطه یازمه ایشلرده‌گی خاطره‌لریمنی توزه‌تیشده، گرامر ده‌گی مرکب جهت‌لرنی توشونتیریش ده، ینگی سوزلرنی اورگه‌تیشده و حتا صحبت‌لشیش مشق‌لرینی بجریشده هم صبرلی استاذدیک یانیمده توره‌دی.
البته، یسمه عقل‌نینگ امکانیت‌لری فقط تیل اورگه‌نیش بیلن چیکلنمه‌یدی. بوگونگی کونده اوشبو تکنالوژی یاردمیده اختصاص‌لشگن متن‌لر یازیش، ترجمه قیلیش، ینگی غایه‌لر ایشلب چیقیش، گرافیک دیزاین‌لر یره‌تیش و حتا کونده‌لیک ایشلرنی ریجه‌لشتیریش هم ممکن. یسمه عقل بیلیم آلیش امکانیت‌لرینی کینگه‌یتیریب، اونی همه اوچون قوله‌ی و آسان قیلدی. ایلگری بیرار سوالی‌میز بولسه، تورلی کتاب‌لرنی ساعت‌لب ورقلشی‌میز یا که متخصص ایزلشی‌میز کیره‌ک ایدی. ایندی ایسه دستلبکی جواب‌لرنی بیر نیچه ثانیه ایچیده آلیشی‌میز ممکن.
بیراق جوده مهم بیر جهت بار: یسمه عقل هیچ قچان کتاب‌لر، بیلیم یورت یا که حقیقی استادلرنینگ اورنینی باسه آلمه‌یدی و باسمسلیگی هم کیره‌ک. اوشبو واسطه‌نینگ حقیقی قیمتی اوندن مستقل اوقیشی‌میز و فکرلشی‌میز بیلن بیرگه‌لیکده فایده‌لنگنیمیزده نمایان بوله‌دی. مین تیار جواب‌لرنی سوره‌ش اورنیگه، یسمه عقل‌دن جریانلرنی توشونیش اوچون فایده‌لنیشنی اورگندیم. اوندن موضوع‌نی باسقیچمه-باسقیچ توشونتیریب بیریشینی، سونگره سواللر بیریب موضوع‌نی قیسی درجه‌ده توشونگنیمنی تیکشیریش‌نی سوره‌یمن. شو طریقه، اورگه‌نیش جریانیده اوزیم هم فعال اشتراک ایته‌من.
بو یول‌نینگ اوزیگه یره‌شه قیینچیلیک‌لری هم بار. یسمه عقل بعضاً خواطرلر گه یول قویه‌دی، تولیق بولمه‌گن یا که چلغیتووچی معلومات‌لرنی تقدیم ایته‌دی. شو سببلی، هر قنده‌ی معلومات‌نی تیکشیرمسدن قبول قیلمسلیگی‌میز کیره‌ک. بوندن تشقری، اونگه حددن تشقری قره‌م بولیب قالیش هم خوفلی دیر. اگر طلبه برچه ایشلرینی ماشینه گه تاپشیرسه، تحصیل قیلیش و معمالرنی حل ایتیش قابلیتینی یوقاته‌دی. اوشبو تکنالوژی آنگی‌میزنی رواجلنتیریشی کیره‌ک، بیزنی دنگسه‌لیککه اورگتمسلیگی لازم.
سوزیم‌نینگ آخریده برچه قیزلر و یاشلر گه شونی ایتماقچی من: چیکلاولر قنچه‌لیک آغیر بولمه‌سین، بیلیم آلیشگه بولگن اشتیاقی‌میز سونیشیگه یول قویمسلیگی‌میز کیره‌ک. تکنالوژی چیگره‌لرنی یوق قیلدی. بیرگینه تلفون و اینترنت گه ایگه قیز تیل اورگه‌نیشی، ینگی کونیکمه‌لرنی ایگللشی و اوز کیله‌جگینی ریجه‌لشتیریشی ممکن. آخر-عاقبت، موفقیت اوزیمیزنینگ سعی-حرکتی‌میز، قطعیتی‌میز و اراده‌میز گه باغلیق. یسمه عقل معجزه یره‌تمه‌یدی، اما یولیمیزنی آسانلشتیره‌دی. کیلینگ، بو امکانیت‌لردن توغری و مسئولیت بیلن فایده‌لنه‌یلیک همده ینه‌ده یخشی کیله‌جک‌نی برپا ایتیشگه بولگن امیدیمیزنی هیچ قچان یوقاتمه‌یلیک.
