نماینده‌لر کینگشی نینگ مالی و بودجه کمیسیونی نینگ ایتیشیچه، ۱۳۹۸- ییلده نماینده‌لر کینگشی تامانیدن، ۹۱- ییل اوچون یالغیز ۱ میلیارد افغانی نظرگه آلینگن ایدی، بیراق حکومت تعیین‌لنگن پول دن میلیون‌لرچه افغانی کوپ بودجه نی وضاحت بیرمسدن مصرف قیلگن.
نماینده‌لر کینگشی نینگ بودجه و مالی کمیسیونی باشلیغی میرافغان صافی نینگ مالیه وزیرلیگی بیلن اوتکزیلگن قوشمه ییغینده ایتیشیچه، نماینده‌لر کینگشی نینگ مالی و بودجه کمیسیونی نیچه مرته مکتوب یولش بیلن مالیه وزیرلیگی دن ۹۱- کود پولی نینگ مصرفی خصوصیده معلومات بیریلیشی‌نی ایسته‌گن، لیکن اوشبو وزارت تورلی بهانه‌لر آرقه‌لی معلومات‌لرنی اولر بیلن شریک قیلمه‌گن.
جناب صافی نینگ ایتیشیچه، حکومت نماینده‌لر کینگشی قرارینی نظرگه آلمسدن ۱ میلیارد ۸۳۰ میلیون و ۴۸۰ مینگ افغانی نی اصول‌گه قرشی مصرف قیلگن و بوتوغریده جواب بیریش‌گه حاضر ایمس.
نماینده‌لر کینگشی نینگ بودجه و مالی کمیسیونی کاتبی سیدعظیم کبرزانی نینگ ایتیشیچه، مالیه وزیرلیگی ۹۱- کود دن مصرف قیلینیشی خصوصیده بولگن معلومات‌لرنی اولر بیلن شریک قیلیش‌گه حاضر بولمه‌گن، بیراق اوشبو کمیسیون اختیاریگه قرار تاپگن بیر فهرست گه کوره، ۱۳۹۸- ییل لویه جرگه هزینه‌سی اوچون ۴۰۹ میلیون افغانی، آی‌لیک حقوق و اعاشه اوچون ۴۷۹ میلیون افغانی، اوپراتیفی اجراات اوچون ۵۱۱ میلیون افغانی، استقلال جشنی اوچون ۳۸۶ میلیون افغانی، امنیتی تحکیمات‌لر و ترمیم اوچون ۱۹۵ میلیون افغانی مصرف قیلینگن.
شونینگدیک، جناب اکبرزانی گه کوره، فرهنگی و هنری فعالیت‌لر اوچون ۱۹۱ میلیون افغانی، اوی و آپارتمان ساتیب آلیش اوچون ۱۴۷ میلیون افغانی، جنجل‌لرنی حل قیلیش کمیسیونی مصرفی ۱۲۲ میلیون افغانی، قطار مواردگه اوزگریش کیلتیریش اوچون ۵۸ میلیون، مساعدت‌لر اوچون ۲۱ میلیون افغانی، عالم‌لر و شهیدلر وارث‌لری نینگ حج هزینه‌سی اوچون ۳۶ میلیون و ینگی ییل بیرمی اوچون ۱۹ میلیون افغانی هزینه قیلینگن.
نماینده‌لر کینگشی نینگ مالی و بودجه کمیسیونی کاتبی اوشبو پول نینگ هزینه‌سینی بودجه اصول‌نامه‌سیگه قرشی عنوان قیله‌دی.
نماینده‌لر کینگشی نینگ مالی و بودجه کمیسیونی عضوی عبدالرووف انعامی نینگ ایتیشیچه، حکومت ۹۱- کود بودجه‌سینی قانونگه قرشی مصرف قیلیش بیلن نماینده‌لر کینگشی نی سلب صلاحیت قیلیش‌نی ایسته‌یدی.
عین‌حالده، مالیه وزیرلیگی اورین باسری حبیب زدران نینگ ایتیشیچه، ۹۱- کود بودجه‌سی نینگ قنده‌ی مصرف قیلینیشی خصوصیده بولگن معلومات ۹۸- ییل قطعیه سندی‌گه درج و نماینده‌لر کینگشی نینگ مالی و بودجه کمیسیونی و ملی تیکشیریش اداره‌سیگه یوباریلگن.
