ناپېژنده وسلهوالو نن چهارشنبه د وري ۲۳مه د خوست د صرافانو مارکېټ کې د احمدشاه مندوزي په نوم یو صراف وژلی دی.
د خوست صرافانو مارکېټ یوه صراف انعامالله ځدراڼ سلاموطندار ته ویلي، پېښه نن سهار هغه مهال رامنځته شوه چې یوشمېر وسلهوالو په نظامي لباس کې له احمدشاه مندوزي د پیسو غوښتنه وکړه.
د نوموړي په وینا، دغه وسلهوال د صرافانو مارکېټ کې له یاد صراف د پیسو غوښتنه کوله، خو نوموړي یادو کسانو ته د پیسو له ورکړې ډډه وکړه چې وروسته بیا شخړه رامنځته شوه او دغو کسانو یاد صراف وواژه.
تراوسه معلومه نه ده چې دغه وسلهوال څوک و او ولې یې له یاد صراف د پیسو غوښتنه کوله. په ورته مهال د یاد صراف له وژل کېدو وروسته خوست کې د صرافانو مارکېټ او هټۍ د اعتراض په توګه تړل شوي دي.
بلخوا د خوست د امنیې قومنداني ویاند مستغفر ګربز هم سلاموطندار ته پېښه تاییدوي، خو له نورو جزیاتو ورکولو ډډه کوي.
سلاموطندار پر ټویټر هم وڅارئ
د خوست د امنیې قومنداني د ویاند په وینا، د پېښې په اړه پلټنې پیل شوي او له بشپړېدو وروسته به له رسنیو سره شریکې شي.
