ملګرو ملتونو اټکل کړی چې په ټوله نړۍ کې به سږکال د ریکارډ په کچه د بېځایه شویو کسانو شمېر له ۱۱۴ میلیونه څخه واوړي.
د یاد سازمان په وینا، دغه شمېر بېځایه شوي د شخړو په حل کې د نړیوالې ټولنې پاتې راتلل په ګوته کوي.
د سلاموطندار پښتو فېسبوکپاڼه وڅارئ
د کډوالو په چارو کې د ملګروملتونو عالي کمېشنري پرون چهارشنبه د اکتوبر ۲۵مه یوه راپور کې ویلي: « په ټوله نړۍ کې د جګړې، ځورونې، تاوتریخوالي او د بشريحقونو سرغړونې له امله به د تېر کال په پرتله د سږکال د ډسمبر تر پایه نړۍ کې د بېځایه شویو شمېر له ۱۱۴ میلیونه واوړي.»
د روان ۲۰۲۳ کال په لومړۍ نیمايي کې د بېځایه شویو اصلي لامل په اوکراین، سوډان، میانمار او د کانکو جمهوریت کې شخړې، افغانسان کې بیا د بشري کړکېچ او سومالیا کې طبیعي پېښې او بېثباتي ښودل شوي دي.
د کډوالو په چارو کې د ملګروملتونو عالي کمېشنر په راپور کې راغلي چې سږکال اوکراین کې یوولس میلیونه وګړي د جګړې له امله له خپلو مېنو بېځایه شوي دي. سوډان کې بیا درې میلیونه کسان جګړې بېځایه کړي دي.
په زوره د بېځایه شویو یو پر درېیمه برخه وګړي د افغانستان، سوریې او اوکراین اړوند اوسېدونکې دي. سوریه په نړۍ کې د کډوالو تر ټولو لوړ شمېر لري.
په خپاره شوي راپور کې ویل شوي چې دا مهال د نړۍ په ۱۳۰ هېوادونو کې څه باندې ۶،۵ میلیونه سوریایان بېځایه او کډوال شوې دي.
پر دې سربېره په سوریه کې دننه هم د نښتو له امله ۶،۷ میلیونه وګړي بېځایه دي. په راپور کې د فلسطیني وګړو د بېځایه شویو شمېر په اړه هم اندېښنه ښودل شوې.
د روان کال په اکتوبر میاشت کې ۱،۴ میلیونه فلسطینیان د اسراییلو د بریدونو له امله خپلو مېنو پرېښودو ته اړ شوې دي.