د کاپیسا امنیتي مسوولان وايي چې دغه ولایت کې د یوې ټرافیکي پېښې له امله شپږ کسان مړه او نهه نور ټپیان شوي دي.
پېښه نن چهارشنبه د غبرګولي لسمه د یاد ولایت د «الهسای» ولسوالي اړوند سیمه کې رامنځته شوې ده.
د سلاموطندار پښتو فېسبوکپاڼه وڅارئ
د کاپیسا د امنیې قومنداني ویاند عبدالفتاح فایز سلاموطندار ته ویلي چې د الهسای ولسوالي د چایخېل کلي په اشپيدره کې یو مازدا ډوله موټر له سړک یوې کندې ته لوېدلی چې له کبله یې شپږ کسان مړه شوي او نهه ټپیان دي.
د نوموړي په وینا، دغه موټر له یادې سیمې څخه د تېرېدو په حال کې و او یوشمېر کروندګر چې غوښتل یې خپلو کروندو ته لاړ شي، له ځان پورته کړي او د لارې په اوږدو کې دغه پېښه رامنځته شوې ده.
په ورته مهال د الهسای ولسوالي مسوولانو بیا سلاموطندار ته ویلي چې په مړو شویو کسانو کې یو ماشوم هم شامل دی او ټپیانو کې ښځې او ماشومان هم شامل دي.
پېښه کې د یوشمېر ټپیانو روغتیايي وضعیت د اندېښنې وړ ښودل شوی دی. د کاپیسا د امنیې قومنداني ویاند د یادې ټرافیکي پېښې لامل د موټر چلوونکي بېاحتیاطي او د لارې خرابوالی په ګوته کړی دی.
