د بهرنیو چارو وزارت سرپرست امیرخان متقي د ملګروملتونو د سرمنشي مرستیال مارټین ګرېفېټس په مشري پلاوي سره کابل کې لیدلي دي.
د بهرنیو چارو وزارت د ویاند مرستیال ضیااحمد تکل پر خپله ټوېټرپاڼه لیکلي چې دواړو لوریو په دې لیدنه کې پر بېلابېلو موضوعاتو بحث او خبرې کړې دي.
د بشري مرستو په چارو کې د ملګرو ملتونو د سرمنشي مرستیال مارتین ګرېفېټس دې لیدنه کې افغانستان کې د نجونو او ښځو پر زدهکړو او کار د بندیزونو په اړه اندېښنه څرګنده کړې ده.
بلخوا د بهرنیو چارو وزارت سرپرست امیرخان متقي د ملګروملتونو پلاوي سره کتنه کې ویلي، افغانستان د نړیوالې ټولنې یوه برخه ده او دغه سازمان د افغانستان او نړۍ په نږدې کولو کې رغنده رول لوبولی شي.
د بهرنیو چارو وزارت سرپرست ویلي، د اسلامي امارت ټولبښنه په معاصر تاریخ کې بېلګه نه لري او غوښتنه یې کړې چې افغانستان کې وروستۍ لاستهراوړنې او فرصتونه نړیوالې ټولنې سره شریک کړي.
نوموړي لیکلي: «افغانستان د نړیوالې ټولنې برخه ده، ملګري ملتونه لوی مسولیت لري چې افغانستان او نړۍ په نږدې کولو کې رغنده رول ولوبوي. متقي زیاته کړه چې موږ د عمومي عفوې یو داسې مثال وړاندې کړ چې معاصر تاریخ یې بېلګه نهلري.»
په ورته مهال د ملګروملتونو د سرمنشي مرستیال مارټین کرېفېټس د اسلامي امارت د رییسالوزرا له دویم مرستیال عبدالسلام حنفي سره هم جلا کتنه کړې ده.
ارګ پر خپله ټوېټرپاڼه لیکلي چې دې لیدنه کې د ملګروملتونو د سرمنشي مرستیال ۲۰۲۳ کال کې ۲۸ میلیونه افغانانو ته د مرستې په موخه د ۴.۶ میلیارډ ډالرو د راټولولو غوښتنه بیا تازه کړې او د مرستو رسولو بهیر کې یې د ښځینه کارکوونکو پر شتون ټينګار کړی دی.
د نوموړي په وینا، د یادو مرستو د رسولو لپاره د ښځینه کارکوونکو شتون اړین دی. په ورته مهال عبدالسلام حنفي هم دې لیدنه کې ویلي چې افغانستان په تېرو څلور لسیزو کې د جګړې له امله زیان لیدلی او پراخو مرستو ته اړتیا لري.
سلاموطندار پر ټوېټرپاڼه هم وڅارئ
دا په روانه اوونۍ کې د ملګروملتونو دویم لوړپوړی چارواکی دی چې کابل ته راځي. له دې وړاندې د ملګروملتونو د سرمنشي مرستیالې امنه محمد هم د یوه پلاوي په مشري کابل ته سفر کړی و.
