د ملګرو ملتونو امنیت شورا دوشنبه، فبرورۍ ۱۰مه د “نړیوالې سولې او ثبات لپاره د ترهګریزو ګواښونو” تر سرلیک لاندې غونډه وکړه.
په دې غونډه کې، د ملګرو ملتونو د ترهګرۍ ضد ادارې، متحده ایالاتو، چین، روسیې او ډنمارک یو ځل بیا د افغانستان له خاورې د ځینو امنیتي ګواښونو د شتون په اړه اندیښنه څرګنده کړه او دا یې د سیمې او نړۍ لپاره یو ګواښ وباله.
د سلاموطندار پښتو فېسبوکپاڼه وڅارئ
د دې شورا غړي د افغانستان له سرپرست حکومت څخه غواړي چې د افغانستان په خاوره کې د امنیتي ګواښونو د لهمنځه وړو لپاره اړین او ښکاره ګامونه واخلي.
د ملګرو ملتونو د ترهګرۍ ضد ادارې مشر ولادیمیر ایوانویچ ورونکوف په دې غونډه کې وویل چې د داعش خراسان لا هم د افغانستان، سیمې او نړۍ لپاره یو ګواښ دی.
هغه وویل: «داعش خراسان لا هم د افغانستان، سیمې او نړۍ لپاره یو جدي ګواښ دی. د افغانستان دننه د بریدونو ترسره کولو سربیره، یاده ډلې په اروپا کې هم بریدونه تنظیم کړي دي.»
د ملګرو ملتونو په امنیت شورا کې د چین، روسیې، ډنمارک او پاکستان استازو هم په دې غونډه کې د افغانستان له خاورې څخه د ځینو امنیتي ګواښونو د شتون په اړه اندېښنه وښوده.
د ملګرو ملتونو په امنیت شورا کې د روسیې سفیر بیا وویل چې نړیوالې ټولنې افغانستان کې پاتې امریکایي وسلو ته د لاسرسي په اړه سمه پاملرنه نهده کړې.
هغه وویل: «له افغانستان څخه د ناټو د چټک وتلو له امله ډېرې وسلې په افغانستان کې پاتې شوې، موږ نشو کولی د افغانستان وضعیت له پامه وغورځوو.»
بلخوا، په ملګرو ملتونو کې د چین سفیر فو کانګ وايي چې سرپرست حکومت باید په دغه هېواد کې د امنیتي ګواښونو په وړاندې کوټلي ګامونه پورته کړي او بیجینګ په دې برخه کې له افغانستان سره همکاري کوي.
هغه وویل: «سرپرست حکومت باید په افغانستان کې د ترهګرو ډلو د له منځه وړلو لپاره اړین او مشخص اقدامات وکړي. چین ژمن دی چې د منځنۍ اسیا هیوادونو او د شانګهای همکارۍ سازمان د هغو هڅو ملاتړ وکړي چې په افغانستان کې د ترهګرو ډلو د له منځه وړلو لپاره له اسلامي امارت سره کار کوي.»
د سیاسي کارپوهان په دې باور دي چې د داسې غونډو په جوړولو سره، امریکا هڅه کوي چې سیمه بدنامه کړي او له افغانستان څخه د روسیې، چین او ایران مخه ونیسي.
خلیل احمدندیم وویل: «دوی د افغانستان او امریکا پروړاندې یوازې یوه لوبه نهغواړي، روسیه، چین او ایران افغانستان لوی لاس ولري او د افغانستان له سرچینو ګټه واخلي، ځکه امریکا دلته میلیاردونه ډالر مصرف کړي او غواړي په همدې سیمه ناامنه کړي او دا ناستې هم ګټه نهلري.
اسلامي امارت تر اوسه د ملګرو ملتونو د امنیت شورا د غړو دې اندیښنې په اړه تازه څه نه دي ویلي، خو تر دې مخکې د سرپرست حکومت د کورنیو چارو وزارت ویاند عبدالمتین قانع د ځینو نړیوالو سازمانونو د اندیښنو په ځواب کې ویلي وو چې افغانستان اوس یو خوندي هیواد دی او په هیواد کې هیڅ داسې ډلې نشته چې افغانستان او نړۍ ته ګواښ رامنځته کړي.
