د لوګر د بدنې روزنې او ورزش امریت چارواکي وایي چې د لومړي ځل لپاره په ازرې ولسوالي کې د لسګونه لوبغاړو ترمنځ د تیږې اچوونې رسمي سیالي شوې دي.
د یاد ولایت د بدنې روزنې او ورزش امر انجینیر مزمل سلاموطندار ته وویل، دا درې ورځنۍ سیالي د تېرې پنجشنبې ورځې راهیسې د لوګر د بدنې روزنې او ورزش امریت له لوري د ازرې ولسوالي په «اکبرخېل» کلي کې پيل شوې وې چې نن پای ته ورسیدې.
نوموړي دغهراز زیاته کړه، په یادو سیالیو کې د ازرې ولسوالي د تیږې اچوونې لسګونه غوره لوبغاړو او سلګونه مینهوالو ګډون کړی وو.
د لوګر د بدني روزنې او وزش امر وویل چې د شویو سیالیو څخه موخه په دغه ولایت کې د تیږې اچوونې سیالیو ته وده ورکول، د ورزشکارانو ترمنځ یووالی او همغږي رامنځته کول دي او د نشهيي توکو پر وړاندې مبارزه کول دي.
د جوړو شویو سیالیو پای کې لومړی مقام ننګیالي، دویم مقام بختمحمد او درېیم مقام جاناغا خپل کړل او یادو کسانو ته د لوګر د بدني روزنې او ورزش امریت له لوري ډالۍ هم ورکړل شوې.
سلاموطندار پر ټویټر هم وڅارئ
باید وویل شي چې د لوګر د بدني روزنې او ورزش امریت په پام کې لري چې ورته سیالۍ د لوګر په مرکز پلعلم، محمداغې، برهکي برک، خروار او څرخ ولسوالیو ته هم وغځوي.
