د اوسپنې ویلې کولو کارخونو د ټولنې مسوولان وايي چې هېواد کې د «پولاد» تولید برخه کې د اړتیا وړ خام مواد په ختمېدو دي او صنعتکارانو ته باید د اوسپنې استخراج زمینه برابره شي.
د اوسپنې ویلې کولو کارخونو د ټولنې رییس نصیراحمد رشتیا نن سهشنبه د غبرګولي ۱۳مه کابل کې د یوې غونډې پر مهال وویل چې د اوسپنې ویلې کولو کارخونو ته باید کانونه په واک کې ورکړل شي.
د سلاموطندار پښتو فېسبوکپاڼه وڅارئ
هغه وویل: «افغانستان کې د پولادو خام مواد خلاص شوي او سرپرست حکومت باید صنعتکارانو ته د تولید زمینه برابره کړي. کانونه باید درجه باندي شي او موږ شدید اړتیا لرو چې کانونه زموږ واک کې راکړل شي.»
د افغانستان د سوداګرۍ او پانګونې خونې د مشرتابه غړی خانجان الکوزی وايي چې هېواد کې باید د سوداګرو ستونزو ته رسېدنه وشي. هغه له سرپرست حکومت غواړي چې د سوداګرو ملاتړ لپاره باید په دولتي ادارو کې له کورنیو تولید شویو توکو استفاده واخیستل شي.
نوموړي وویل: «باید د سوداګرو ستونزو لکه د برښنا او ځمکې ستونزو ته رسېدنه وشي. موږ له ا.ا غواړو چې د سوداګرو ملاتړ لپاره باید دولتي ادارو کې له کورني تولیداتو استفاده وشي.»
د صنعت او سوداګرۍ وزارت سرپرست نورالدین عزیزي دې غونډه کې وویل چې صنعتکارانو ته د کانونو استخراج موضوع به کابینې او اقتصادي کمېسیون ته وړاندې کړي.
هغه وویل: «ټاکل شوې چې د کابینې له لوري یوه طرحه تایید شي له مخې به یې ټولو وزارتخونې او دولتي ادارې له کورني تولیداتو استفاده کوي او د کانونو د استخراج موضوع به کابینې او اقتصادي کمېسیون کې شریک کړم.»
هېواد کې د اوسپنې تولید برخه کې د خامو موادو د ختمېدو په اړه دغه اندېښنې داسې مهال دي چې نن کابل کې د لس میلیونه ډالرو په ارزښت د فقیري سټیل په نوم د اوسپنې ویلې کولو کارخونې په فعالیت پیل وکړ.