د لوګر محلي مسوولان وايي چې د دغه ولایت په مرکز پُلعلم کې د اورلګېدنې له امله خلکو ته درانه مالي زیانونه اوښتې دي.
دغه اورلګېدنه بېګاه شپه ۸بجې د پُلعلم ښار د لرګیو په ټالونو کې رامنځته شوې ده.
د سلاموطندار پښتو برخه دلته وڅارئ
د لوګر د والي ویاند عمرمنصور سلاموطندار ته ویلي چې اورلګېدنه د پُلعلم سوېل دروازې ته څېرمه د لرګېو په ټالونو کې شوې چې د امنیتي ځواکونو او اطفایې کارکوونکو له لوري مهار شوې.
نوموړي زیاته کړه چې خلکو ته د اوښتو مالي زیانونه په اړه به ډېر ژر یو ګډ پلاوی وټاکل شي او د اوښتو مالي زیانونو په اړه به پلټنه وکړي.
تراوسه معلومه نه ده چې دغه اورلګېدنه د څه له کبله رامنځته شوې ده.
بلخوا د مرکز پلعلم یوه اوسېدونکي روحالله سلام وطندار ته وویل چې د یادې اورلګېدنې له امله د لرګیو درې ټالونه او دوه نجارۍ په بشپړه توګه سوځېدلي او خلکو ته سلګونه زره افغانۍ مالي زیان اوښتی دی.
نوموړی له حکومت څخه غواړي چې پلعلم کې د اورلګېدنې له امله د رامنځته شوې مالي زیان له امله زیانمنو شویو لرګیو پلورونکو سره مرسته وکړي.