د پکتیکا په «یحییخېلو» ولسوالي کې د ۸۰زره امریکايي ډالرو په ارزښت د یوه پُل د جوړېدو چارې پیل شوې.
د پکتيکا ولايت مقام څخه سلاموطندار ته په رالېږل شوې خبرپاڼه کې ليکل شوي چې پرون «چهارشنبه، غبرګولي دویمه» د یوه سوداګر په شخصي لګښت د یحییخېلو ولسوالي د «غيبيخېلو» سيمه کې د يوه پُل د جوړېدو چارې پيل شوې.
د سلاموطندار پښتو فېسبوکپاڼه وڅارئ
په خبرپاڼه کې د ياد پُل د جوړونکي له قوله ليکل شوي چې د دې پله پر جوړولو به ۸۰زره امريکايي ډالر لګښت راشي او د دوو مياشتو په موده کې به یې، چارې بشپړې شي.
د سيمي اوسېدونکي د دې پُل پر جوړېدو خوښ دي او وايي، تر دې وړاندې به د سېلاب راوتو پرمهال له ګڼو ستونزو سره مخ و.
په خبرپاڼه کې ويل شوي چې د دغه پُل د چارو پيل مراسمو کې د پکتيکا والي عبدالحق عابد له نورو شتمنو هم وغوښتل چې تر خپل توانه دې د هېواد په ابادۍ کې ونډه واخلي.